Млади од Тајван во Скопје криминалци ги тепале да прават измами

Триесет и девет жртви на трудова експлоатација од Тајван се идентификувани во Македонија во акцијата на Секторот за меѓународна полициска соработка, Одделот за сузбивање на организиран и сериозен криминал-Национална единица за сузбивање на криумчарење на мигранти и Одделот за криминалистичка полиција по информациите дека криминална група од Тајван врши телекомуникациски измами и трудова експлоатација на државјани од оваа земја. Во акцијата се приведени девет лица, државјани на Тајван.

Како што соопшти МВР, криминалната група функционирала во повеќе земји и по првичните оперативни информации за нејзино присуство на нашата територија, во координација со полицијата на Тајван и Интерпол веднаш се преземени мерки за нејзино детектирање и сузбивање.

„Млади луѓе од Тајван биле регрутирани од страна на т.н. ‘синдикати’ за да работат во странство. Повеќето од младите не ги знаат сите детали за работата која треба да ја вршат сѐ додека не стигнат до крајната дестинација. По пристигнувањето тие се физички ограничени во куќата, т.н. ‘кол центар за телефонски измами’ и немаат пристап до нивните пасоши и мобилни телефони. Тие се принудени да работат со часови без да им бидат исплаќани надоместоци или плати. Жртвите биле тепани доколку не ги почитуваат наредбите. Т.н. ‘синдикати’, користат брз интернет за воспоставување меѓународни разговори. Телефонските оператори од прво ниво се претставуваат лажно дека се службеници во банка или поштенска служба или службеници за осигурување. Следно, операторите од второ ниво лажно се претставуваат како полициски службеници за да приберат целосни лични податоци и бараат доказ за извршена уплата за некаква казна. Конечно, жртвите се префрлани во ‘трето ниво’, каде операторите им се претставуваат како обвинител или судија и ги убедуваат жртвите дека ќе бидат соочени со тешки обвиненија доколку не соработуваат и доколку не ги префрлат парите на назначените сметки со цел намалување на казната или ослободување од казна“, објасни МВР за тоа како работела групата.

Во координација со Основното јавно обвинителство за гонење на организаран криминал и корупција и добиена наредба од судија на претходна постапка, на 07.05.2021 извршени се претреси на две локации во населба Бардовци, Скопје. На првата локација затекнати и приведени се шест членови на криминалната група, како и 25 жртви (сите државјани на Тајван), а на втората локација еден член на криминалната група и 10 жртви (сите државјани на Тајван). Откриени се уште две лица од криминалната група, кои биле сместени во хотел во Скопје, како и уште четири лица-жртви, кои биле сместени во друг хотел во Скопје.

По добиени насоки од јавен обвинител, сите обезбедени материјални докази ќе бидат предадени на надлежните служби за спроведување на законот од Тајван, заедно со идентификуваните жртви и лицата идентификувани како членови на меѓународната криминална група, за нивно натамошно процесуирање во Тајван, каде се обвинети за повеќе кривични дела.

Back to top button
Close