Обвинителство поднесе жалба за куќниот притвор на Јахоски, сопственикот на „Пуцко Петрол“

Обвинителството за гонење на организиран криминал и корупција го обжали домашниот притвор на Асмир Јахоски, сопственик на „Пуцко Петрол“, а кој му беше одреден по последната акција со аферата за мазут.

-Основното јавно обвинителство за гонење на организиран криминал и корупција го разгледа Решението со кое не се прифати предлогот на обвинителството за определување на мерка притвор и на осомничен му беше определена мерка куќен притвор и мерка на претпазливост – одземање на патна исправа и забрана за издавање на нова патна исправа. Незадоволно од ваквата одлука Основното јавно обвинителство за гонење на организиран криминал и корупција во законски утврдениот рок до Кривичниот совет при Основниот кривичен суд – Скопје поднесе жалба поради суштествена повреда на одредбите од кривичната постапка и побара Кривичниот совет да ги преиспита фактите содржани во жалбата, како и решавачките факти врз основа на кои е донесено обжаленото Решение, информираа од Обвинителството.

За разлика од Јахоски, судот му одреди 30-дневен притвор на бизнисменот Ратко Капушевски, генерален директор на фирмата РКМ за трговија со енергенси и нафтени деривати.