Побарано разрешување на градоначалникот на Белград по инцидент со опозициска советничка, Шапиќ не планира да поднесе оставка
Градоначалникот на Белград, Александар Шапиќ, од владејачката Српска напредна партија (СНС), денеска се соочи со барања да поднесе оставка или да биде отстранет од функцијата откако синоќа учествуваше во инцидент и туркање на улица и повредил опозициска советничка во општина Нови Белград.
Според сведочењето на Татјана Мичиќ, советничка на опозициското движење Крени-Промени, за белградските медиуми, Шапиќ ја турнал, ја удрил во носот и ја повредил, по вербален конфликт што го започнал тој на улицата додека таа шетала со својот сопруг.
Инцидентот се случи во екот на кампањата за предвремените парламентарни избори, закажани за 25 октомври, на кои СНС на Шапиќ, меѓу другото, инсистира на заштита и почитување на жените, а опозицијата побара тој да биде отстранет од функцијата градоначалник или да поднесе оставка.
Шапиќ негира дека ја повредил советничката во инцидентот за кој Движењето „Крени-Промени“ објави на социјалните мрежи, а подоцна и во соопштение за медиумите, емитувајќи видео од неговото носење во полиција.
„Мојот машки и човечки кодекс никогаш не ми дозволува да бидам насилен кон жените, ниту пак некогаш би си дозволил тоа, бидејќи знам колку е лошо и погрешно насилството“, рече Шапиќ денеска на прес-конференцијата што ја свика за да го објасни инцидентот, кој го нарекува „наместен“, а тврдењата за неговата вина „лажни“.
Тој тврди дека советничката претходно му ја загрозила безбедноста делејќи летоци пред неговата куќа во населбата Бежаниска коса. Опозицијата, преку повремени протести, со месеци тврди дека Шапиќ нелегално ја надградил и проширил куќата.
Третото основно јавно обвинителство во Белград денеска објави дека ѝ дало наредба на полицијата да собере информации за инцидентот во кој се вклучени советничката Татјана Мициќ, нејзиниот сопруг и градоначалникот на српската престолнина.
Според соопштението на обвинителството, полицијата преку тестирање утврдила дека Шапиќ не бил под дејство на алкохол или психоактивни супстанции.
Шапиќ денеска изјави дека им се извинува на „пријателите од СНС и на Александар Вучиќ, кој ја води кампањата“ поради инцидентот „кој требало да се избегне, но не бил“. Тој ја отфрли можноста за оставка.
Александар Шапиќ, поранешен ватерполо репрезентативец и еден од водечките луѓе на владејачката Српска напредна партија, е градоначалник на Белград од 2024 година и неколку пати досега го привлече вниманието на јавноста со своето однесување.
Меѓу другото, веќе во првата година од својот мандат, тој предложи гробот на поранешниот претседател на Југославија, Јосип Броз Тито, да се премести од мавзолејот – Куќата на цвеќето во Белград, и да се постави споменик на четничкиот командант од Втората светска војна, Дража Михаиловиќ, во паркот на Теразиската тераса, во центарот на градот.
