Путин со нов указ: Државата ќе презема контрола врз небезбедните стратешки објекти

Рускиот претседател Владимир Путин издаде указ со кој ѝ се дозволува на државата привремено да презема контрола врз стратешки важни инфраструктурни објекти, доколку тие не се доволно заштитени од украински напади со дронови и други закани.

Според указот, државата ќе може да ги презема контролата, имотот и сопственичките права доколку компаниите одговорни за објектите не ги исполниле обврските за нивна заштита или доцнат со нивната обнова по претрпените напади.

Овие мерки се однесуваат на објектите во секторите за гориво, енергетика, индустрија, комуникации, транспорт и логистика, кои се од клучно значење за безбедноста и економската стабилност на земјата и населението.

Указот се донесува во услови на засилени украински напади врз руските рафинерии за нафта и складишта за гориво.

Минатата недела Путин ѝ нареди на Владата да започне програма за обнова на трговските магацини оштетени или уништени во украинските напади изминативе недели.

Од 18 јули наваму, Украина нападна најмалку дваесетина магацини на најголемиот руски онлајн трговец „Вајлдберис“.

Денеска и вториот по големина онлајн трговец во Русија, „Озон“, соопшти дека четири негови логистички центри во јужна Русија исто така биле цел на напади.