Радев ги презеде посмртните останки на Цар Самоил од Мицотакис
Од своја страна, Бугарија ѝ предава на Грција 48 предмети, главно црковни прибори од неколку манастири во Егејска Македонија, кои биле спасени од бугарските научници за време на Првата светска војна
Бугарскиот премиер Румен Радев пристигна во Музејот на византиската култура во Солун, каде што се одвиваше постапката за предавање на посмртните останки на Цар Самоил, пренесува бугарската агенција БГНЕС.
Бугарскиот премиер бил пречекан од неговиот грчки домаќин Киријакос Мицотакис, а во нивно присуство, двајцата министри за култура потпишале протокол за предавање на посмртните останки на средновековниот владетел.
Од своја страна, Бугарија ѝ предава на Грција 48 предмети, главно црковни прибори од неколку манастири во Егејска Македонија, кои биле спасени од бугарските научници за време на Првата светска војна.
Грчкиот премиер Киријакос Мицотакис ја истакнал важноста на враќањето на црковните прибори во Грција, вклучително и епископскиот престол. Тој истакна дека историските и религиозните реликвии не можe да бидат предмет на воено запленување.
„Денес воспоставуваме многу длабока врска со Бугарија, која не е само културна. Враќањето на важен црковен сад создава нови мостови на комуникација“, рекол Мицотакис кој му се заблагодарил на својот бугарски колега Румен Радев.
Грчкиот премиер рекол дека 48-те предмети, кои бугарската страна ги стекнала во 1917 година за време на Првата светска војна од митрополиите Сер и Негрита, се од големо значење за духовниот и емоционалниот живот на неговата земја.
„За возврат, Атина ја исполнува својата историска должност со враќањето на посмртните останки на Цар Самоил, кои биле пронајдени во базиликата ‘Свети Ахил’. Тие се чувани со децении од страна на грчката влада“, рекол Мицотакис.
Тој потсетил дека преговорите за враќање на Цар Самоил започнале уште во 1970-тите, во времето на Константинос Караманлис и Тодор Живков.
„Потребно било време за да се надминат предизвиците од минатото. Нашата соработка сега започнува. Ова е првата фаза за враќање на други реликвии од Бугарија“, рекол Мицотакис.
Румен Радев рекол дека за него е голема чест да биде во Музејот во Солун.
„Аспирацијата на бугарската држава да ги врати останките датира од 1960-тите, кога овие останки биле откриени во црквата ‘Свети Ахил’. Мило ми е што денес го исполнуваме тестаментот на нивниот откривач, проф. Муцопулос, да ги врати. Би сакал да му изразам благодарност на Мицотакис за постигнувањето на овој историски договор за нашите две земји, за вашето политичко водство“, рекол бугарскиот премиер.
Тој потсетил дека во текот на изминатите шест децении е вложена напорна работа за да се стигне до денес.
„Ако во минатото Цар Самоил нè раздели, денес нè обединува. Нашето заедничко членство во ЕУ им овозможува на нашите две земји подобро да го почувствуваат немирот на другата страна. По илјадници години конфронтација, споделување на турбулентно минато на Балканот – обележано со војни, денес ја означуваме следната фаза во развојот и продлабочувањето на нашите односи. Чудо е што по повеќе од 1 000 години судири уживаме високо ниво на добрососедски односи. Последните децении придонесоа за ова, успеавме да ги оставиме зад себе сенките на минатото и да изградиме доверба и пријателство. Мило ми е што нашите два народа го оставија зад себе ова соперништво“, рекол Радев.
Според него, најважно е да се има вистински пријател.
„Изградивме оска на стабилност и просперитет со Грција, а културните односи се важен дел од оваа оска“, нагласил бугарскиот премиер.
По пренесувањето на посмртните останки на Цар Самоил, тие ќе бидат пренесени во Софија, каде што се очекува свечена церемонија на плоштадот „Принц Александар I Батенберг“, по што ќе следи поворка до црквата „Света Софија“. Таму, посмртните останки на Цар Самоил ќе го најдат своето вечно почивалиште.
Посмртните останки на Цар Самоил ги открил професорот Николаос Муцопулос во базиликата „Свети Ахил“ во 1969 година. Тој открил четири саркофази. Само еден од нив содржел недопрен скелет. Антрополошките студии идентификувале постар маж од околу 70 години, со карактеристични траги од удар на левата рака. Во гробот биле пронајдени и остатоци од богата ткаенина и фин оклоп. Целокупноста на археолошкиот контекст, антрополошките податоци и историските информации е основа за неговата идентификација како Цар Самоил.
