Републичкиот обвинител Коцевски не му вршел притисок на Хајрулахи, одлучи Советот на јавните обвинители
Републичкиот јавен обвинител Љупчо Коцевски не му вршел притисок на шефот на Вишото скопско обвинителство Мустафа Хајрулахи, ниту на вишиот обвинител Јован Цветановски, за тоа како да постапуваат по предметот ,,Бонусите на СЈО”. Оваа одлука денеска ја донесе Советот на јавните обвинители.
-Под точка 2 од дневниот ред едногласно се донесе одлука да јавноста биде исклучена при разгледување на предметот ДОВ бр.30/24 заради заштита на угледот и интегритетот на јавните обвинители, но по завршувањето на дискусијата по предметот, јавно се објави заклучокот донесен од страна на Советот на јавните обвинители во врска со наведениот предмет. Заклучокот е дека не се утврди влијание на Јавниот обвинител на Република Северна Македонија врз работата на Вишиот јавен обвинител на Вишото јавно обвинителство Скопје, Мустафа Хајрулахи и на јавниот обвинител во Вишото јавно обвинителство Скопје, Јован Цветановски во врска со конкретниот предмет и не е загрозена нивната самостојност во одлучувањето, информираат од Советот на јавните обвинители.
Вчера пак вишиот обвинител Цветановски донесе одлука за предметот „Бонусите на СЈО“ и реши да го укине решението на Обвинителството за гонење на организиран криминал и корупција за запирање на постапката и предметот со напатствија го врати назад.
Претходно, Обвинителството за гонење на организиран криминал и корупција одлучи дека обвинителите од СЈО не треба кривично да одговараат за бонусите кои ги земале во СЈО, бидејќи не го прекршиле законот, односно нивната шефица Катица Јанева, која е потписникот. Сепак, ваквата одлука не и се допадна на политичката партија ВМРО-ДПМНЕ, па поднесо жалба до Вишото обвинителство во Скопје.
Сега повторно Обвинителството за гонење на организиран криминал и корупција ќе треба да одлучи за предметот, односно дали ќе ја отфрли кривичната пријава или ќе поднесе обвинение.
