САД обвинија пакистански државјанин за подготовка на атентат врз Трамп и други функционери

Американското Министерство за правда обвини пакистански државјанин за наводни врски со иранската влада за заговор за атентат на високи американски политички функционери, што доведе до зголемена безбедност на поранешниот претседател Доналд Трамп и други функционери, се вели во обвинението.

Инспекторите на ФБИ веруваат дека Трамп и други сегашни и поранешни функционери на американската влада биле цел на заговорот, изјави американски функционер запознаен со ова прашање.

 

Асиф Мерчант (46) е обвинет дека патувал во Њујорк и работел со платен убиец за да ги изврши убиствата кон крајот на август или почетокот на септември, според обвиненијата поднесени од федералните обвинители во Бруклин, Њујорк.

Мерчант беше уапсен на 12 јули додека се подготвувал да ги напушти Соединетите Држави, рекоа обвинителите, набргу откако се сретнал со наводните убијци за кои верувал дека ќе ги извршат убиствата, но всушност биле тајни органи за спроведување на законот. Тој е во федерален притвор.

ФБИ истражуваше наводен меѓународен заговор за атентат неколку недели пред 20-годишник од Пенсилванија за малку да го убие поранешниот претседател Трамп на еден од неговите собири. Службеник за спроведување на законот изјавил за Си-ен-ен дека иследниците не пронашле докази дека Мерчант бил поврзан со пукањето во Батлер, Пенсилванија.

ФБИ верува дека го спречил заговорот на Мерчант пред каков било напад и соработува со истражителите од неговото апсење, посочија американските власти. Но, познатите закани од иранската влада против Трамп го натераа ФБИ да ги пренесе информациите до американската тајна служба, што ја зголеми безбедносната заштита на поранешниот претседател, изјавија официјални лица.

Според американските безбедносни претставници, заговорот е дел од деталните ирански планови за наводно убиство на Трамп.

Американската влада неколку пати изрази загриженост дека Иран може да се обиде да се одмазди за нападот со американско беспилотно летало во 2020 година, во кој беше убиен генералот Касем Сулејмани, највисокиот генерал на Корпусот на иранската револуционерна гарда (ИРГЦ), обидувајќи се да го убие Трамп или неговите поранешни советници.

Американските обвинители во минатото обвинија други луѓе за слични обиди за атентат, вклучувајќи го и обвинението поднесено во 2022 година против 45-годишен ирански државјанин и член на ИРГЦ, кој наводно се обидел да плати 300 000 долари на лице во САД за да го убие поранешниот советник за национална безбедност Џон Болтон. Во тој случај, обвинителите тврдат дека планот „веројатно бил одмазда“ за смртта на Сулејмани.