Шефот на украинското разузнавање тврди: Путин користи двојници

Шефот на украинската разузнавачка служба, Кирило Буданов, за британски Дејли Меил изјави дека рускиот претседател Владимир Путин користи двојници кои биле подложени на пластична операција.

Буданов во интервју за „Дејли мејл“ рече дека украинската влада е многу збунета од постојаните воени грешки на Русија за време на инвазијата и затоа многу луѓе се прашуваат дали Путин сè уште ги носи клучните одлуки.

„Колку и да е лош, Путин не беше идиот. Рускиот план не следи никаква логика. Големото прашање е дали вистинскиот Путин сè уште постои“, рече шефот на украинската разузнавачка служба, тврдејќи дека неговите луѓе откриле двојници кои биле користени за замена Путин во посебни прилики.

Буданов, кој е и генерал, вели дека употребата на двојници сега е вообичаена практика.

„Конкретно знаеме за три лица кои постојано се појавуваат. Сите направиле пластична операција за да изгледаат исто. Она што ги издава е нивната висина, а тоа може да се види на слики и видеа. Исто така, се забележуваат разлики во гестовите, говорот на телото и ушите бидејќи тие се уникатни за секој човек“, вели разузнавачот.

Буданов смета дека промените се неизбежни во Москва и дека смената на Путин е во интерес на „целиот цивилизиран свет“. Руските државни медиуми го поврзуваат Буданов со тајни операции на Крим, бидејќи тој е поранешен оперативец на специјалните сили, кој подоцна беше назначен за шеф на военото разузнавање.