Сојузникот на Асад врзан за дрво, маван со стапови и погубен на улица

Сојузникот на Асад беше јавно егзекутиран од борци од новата исламистичка администрација во Сирија, објави Сириската опсерваторија за човекови права. Воен монитор објави дека борците вчераутро го застрелале Мазен Кнене во глава на улица во Думар, предградие на главниот град Дамаск. Оваа област се смета за најбезбеден дел од градот од почетокот на сириската граѓанска војна.

На социјалните мрежи кружат снимки на кои се гледа телото врзано за дрво. Видливи се рани од куршум, а облеката му е крвава. Околу телото се собраа деца од кои некои снимаа со своите мобилни телефони, а други го напаѓаа телото – го удираа со стапови и го клоцаа во главата.

Сириската опсерваторија за човекови права соопшти како борците обвиниле локален функционер дека бил доушник на соборениот претседател Башар ал Асад, опишувајќи го како „еден од најистакнатите лојалисти на поранешниот режим“.

Се наведува дека тој бил „обвинет за пишување злонамерни безбедносни извештаи кои доведоа до прогон и затворање на многу млади мажи“ под Асад, чие владеење заврши на 8 декември. Иако не е конкретизирано каква улога имал Кнене под режимот на Асад, онлајн извештаите го опишуваат како градоначалник на Думар.

Во последните денови, новите сириски власти започнаа безбедносни претреси насочени кон „остатоците од режимот на соборениот лидер“ во неколку области. Анас Хатаб, новиот шеф на Генералната разузнавачка служба, вети ремонт на безбедносниот апарат, осудувајќи ја „неправдата и тиранијата на поранешниот режим, чии агенции беа корумпирани и нанесуваа страдања на народот“.

Преодните власти, назначени од исламистичката група Хајат Тахрир ал-Шам (ХТС), се обидоа да ги уверат верските и етничките малцинства дека нивните права ќе бидат зачувани. ХТС, исто така, објави дека го амнестирала целиот воен персонал кој бил ангажиран за време на владеењето на Асад.