Спасовски: Граѓаните едвај крпат крај со крај
Граѓаните едвај крпат крај со крај, порача пратеникот на СДСМ и поранешен министер Оливер Спасовски во интервју во емисијата „Ноќно студио“ на 4ТВ, критикувајќи ја Владата дека зборува за историски економски успеси, додека државата се задолжува по скратена постапка и, според него, покажува сериозен проблем со ликвидноста на буџетот.
Спасовски оцени дека реториката на Владата предводена од ВМРО-ДПМНЕ за „трета економија во Европа“ се судира со секојдневието на граѓаните. Според него, ако економијата навистина е толку стабилна, тогаш нема логика државата да брза со ново задолжување на меѓународниот пазар без редовна и транспарентна дебата.
Во интервјуто, тој посочи дека самото носење на законот по скратена постапка отвора сомнеж дека нешто се крие. Спасовски тврди дека образложенијата на заменик-министерот за финансии биле противречни, бидејќи задолжувањето истовремено се претставува како редовно и планирано, но и како потребно за итна фискална консолидација.
Според бројките што ги наведе Спасовски, буџетот предвидува приходи од 374,9 милијарди денари и расходи од 414,2 милијарди денари, со дефицит од 39,2 милијарди денари, односно 3,5 проценти од БДП. Тој предупредува дека тоа е над законскиот максимум од 3 проценти и дека ваквата проекција се повторува втора година по ред.
Најостриот дел од неговата критика се однесува на реализацијата во првите пет месеци. Спасовски наведува дека приходите достигнале 131,3 милијарди денари, а расходите 163,6 милијарди денари, што значи дека веќе е направен дефицит од 32,3 милијарди денари. Според него, ако годишниот дефицит е планиран на 39,2 милијарди, Владата веќе потрошила околу 82 проценти од дозволениот простор.
Спасовски предупреди и дека со новото задолжување од 260 милиони евра, плус камати и трошоци од 69 милиони евра, товарот за граѓаните достигнува околу 330 милиони евра. Јавниот долг, како што посочи, веќе е 59,7 проценти од БДП без најновото задолжување, што според него ја турка државата над ризичната граница од 60 проценти.
