Судијата Наке Георгиев поднесе оставка од Судски совет за син му да стане судија во кривичен

Судијата од Врховен суд Наке Георгиев си поднесе оставка од позицијата член на Судскиот совет.

Сето ова доаѓа откако неколку дена траат кавги во Судски совет дека не е законски тој како член на Судскиот совет да го бира неговиот син за судија.

„Драго ми е што беше разбран од колегите категоричниот став дека законски не е возможно судија да биде избран во ситуација кога член од семејството е избран во Судскиот совет” рече Весна Дамева.

Судиите Ивица Николовски, Мери Радевска и Весна Дамева, според неофицијалните информации, го убедиле Георгиев дека мора да си даде оставка од функцијата, ако сака неговиот син кој заврши Академија да биде избран за судија.

Наке Георгиев се кандидираше за член на Судскиот совет како единствен кандидат од Врховен суд, а поддржувачите од Советот, му ја запреа постапката за разрешување.

За истата работа за која беше претставката, тројца апелациони судии од Штип беа разрешени, но тој се спаси.

Пред две недели беше избран за нов член на Судскиот совет од редот на врхвните судии само со 6 гласа, од кои едниот беше неговиот.

Додека Наке Георгиев не дочека да учествува на седница на Судскиот совет, неговите „несудени“ колеги од ова тело неколку часа по оставката избраа 25 нови судии, меѓу кои и неговиот син Кирил Георгиев.

Како еден од кандидати од последната генерација што ја заврши Академијата за судии и јавни обвинители, синот Георгиев конкурираше за судија во Основниот кривичен суд Скопје, а денешниот избор во Судскиот совет и за него и за останатите нови судии беше едногласен со 11 гласа „за“.

Доколку таткото не си поднесеше оставка од член на Судскиот совет, тогаш синот немаше да може да биде избран или евентуалниот избор би бил противзаконски бидејќи Законот за судови предвидува дека за судија или поротник не може да бие избрано лице кое со член на советот е во сродство во права линија или страничка до трет степен.

На седницата на Судскиот совет откако синот беше избран за судија кривичар во Скопје, членката Весна Дамева рече дека ѝ е мило што до Наке Георгиев допрел нејзиниот и ставот не некои нејзини колеги дека ако не поднесе оставка ќе го прекршат законот. Дамева јавно му се заблагодари што „нашол за доблест да го не вовлекува Судскиот совет во какви било поинакви размислувања понатаму“.