Светската спортска академија „Лауреус“ ја повлече номинацијата на Јаник Синер за Спортист на годината

Светската спортска академија „Лауреус“ ја повлече номинацијата на светскиот рекет број еден во машкиот тенис, Јаник Синер за наградата Спортист на годината, поради неговата тримесечна забрана за допинг.

Синер, кој ја прифати санкцијата на почетокот на овој месец, беше позитивен на анаболичен стероид „клостебол“, кој му беше даден од член на неговиот тим. Суспензијата на Италијанецот ќе заврши на 4 мај.

-Го следевме овој случај, одлуките на релевантните органи и, иако ги забележавме олеснителните околности, веруваме дека тримесечната забрана ја прави номинацијата недозволива. Јаник и неговиот тим се информирани, рече претседателот на Академијата „Лауреус“, Шон Фицпатрик во писмото упатено до членовите на комисијата за номинации.

Светските спортски награди „Лауреус“ се доделуваат од 2000 година, со номинирани избрани од меѓународните медиуми, со признавање на индивидуалните и тимските достигнувања во спортот.

Добитниците на овогодинешните награди ќе бидат објавени на 3 март на церемонија во Мадрид