(ВИДЕО) Ковачевски: Прашањето на овие избори е Европа или изолација
Прашањето на овие избори е дали ќе продолжиме по европскиот пат и ќе станеме европска држава со европски стандард или ќе се вратиме назад во изолација и во мрачното минато, порача претседателот на СДСМ, Димитар Ковачевски. На отворањето на промотивен штаб на СДСМ во Струмица тој истакна дека на претстојните избори е одлуката за иднината на државата.
Нашата борба за Европа е борба за подобар животен стандард, за повисоки плати и пензии, силна економија, развиено земјоделство, истакна Ковачевски.
„Со ДПМНЕ ја спуштаме главата и прифаќаме дека никогаш нема да биде подобро, таа достижна цел за европска иднина им ја препуштаме на некои други. Се откажуваме од иднината. Со СДСМ продолжуваме да се бориме за она што го заслужуваме, не се откажуваме и на крајот победуваме. Тоа е разликата,“рече Ковачевски.
Во говорот пред присутните Ковачевски порача дека единствениот вистински начин да ја промениме нашата земја на подобро зависи од континуираните реформи кои водат кон членство во ЕУ. Ова е единствената можна светла македонска иднина – европската, посочи лидерот на СДСМ.
„Гледам дека кога ќе почнам да зборувам за ЕУ, некои луѓе негодуваат. Верувајте ми, јас ги почувствував неправдите од различни претставници на ЕУ повеќе од сите овде и знам како се чувствувате. Човек во тешки моменти помислува и на откажување. Но, што тогаш? Кој е следниот чекор? Која е алтернативата? Можеме да одложиме, можеме да се сокриеме, да чекаме во темница уште 11 години како во времето на Груевски и да загубиме многу. Токму ова го предлага ДПМНЕ. Да чекаме во место, да не правиме ништо, да се откажеме од нашата иднина. Тоа личи навидум лесно, ама на крајот цената ќе ја платиме прескапо. Ние, сегашните, но најмногу идните генерации,“додаде Ковачевски.
На фотографиите од отворањето на промотивниот штаб во Струмица споделени на фејсбук-страницата на СДСМ, присутни се и претходниот лидер и премиер Зоран Заев, како и ексминистерот за здравство Венко Филипче, за кој има најави дека ќе биде носител на листата на СДСМ и коалицијата во Изборната единица 4 (струмичко-прилепската).