Доналд Трамп повторно стана предмет на потсмев на социјалните мрежи, откако во изјава за Грција зборуваше како да станува збор за човек, а не за држава.

Одговарајќи на прашање поврзано со поддршката на Атина во однос на кризата со Иран, Трамп рече дека „Грција многу помогнала“, а потоа додаде дека „тој е одличен фраер“. Кратката реченица беше доволна за видеото да се прошири како нов гаф на американскиот претседател.

Иако грчките медиуми изјавата ја пренесоа како пофалба за Грција како сојузник и за премиерот Киријакос Мицотакис, спорната формулација во самиот исечок звучи како Трамп да ја персонализира државата и да зборува за Грција во машки род, како за конкретна личност.

Гафот веднаш беше ставен во поширокиот контекст на јавните настапи на Трамп, неговите нејасни реченици и сè почестите реакции за неговата говорна и политичка кондиција.

Во дипломатска смисла, изјавата требаше да биде комплимент за Атина и за грчкиот премиер, особено поради позицијата на Грција во однос на американската политика кон Иран. Но во медиумската реалност на Трамп, пораката повторно ја засени начинот на кој беше кажана.

Наместо да остане како обична пофалба за сојузник, реченицата стана вирален пример за тоа како американскиот претседател од една дипломатска формулација направи интернет-шега: Грција, според неговиот говор, не беше само држава, туку „одличен тип“.