ВМРО-ДПМНЕ за смената на скопските директори: Арсовска ги задоволува апетитите на коалицијата на СДСМ, Левица, ГРОМ и ДУИ

Смената на дел од скопските директори која денеска ја најави градоначалничката Данела Арсовска, според опозициската ВМРО-ДПМНЕ, е чекор со кој таа ја зацврстува и ја задоволува коалицијата на СДСМ, Левица, ГРОМ и ДУИ, зашто, како што велат, овие партии ја сочинуваат власта и ги пополнуваат директорските места во Градот Скопје.

Дополнително, од партијата велат дека со ваквите кадровски решенија се гледа подвоениот и импулсивен карактер на скопската градоначалничка, на која, како што нагласуваат, не ѝ се погодил ниту еден директор кој самата го поставила.

„Кога да ѝ се верува на Арсовска, кога велеше дека Марјанчо Митовски е најдоброто решение за ‘Водовод и канализација’, или сега кога го разрешува и вели дека Драган Илиевски кого претходно незаконски го назначи на Зоолошка градина сега е најдоброто решение за ЈП ‘Водовод и канализација’? Или во прашање е одржување на нејзиниот криминален интерес за раскрчмување на ‘Водовод и канализација’ и бизнис интерес за пречистителната станица?“наведуваат од ВМРО-ДПМНЕ во писменото соопштение до медиумите.

Претходно денеска, скопската градоначалничка најави нова смена на директори во дел од скопските претпријатија.

Нови лица на директорските позиции ќе добијат Јавното претпријатие „Водовод и канализација“, Зоолошката градина и Младинскиот културен центар (МКЦ), а како причина за ова, од Градот Скопје го наведоа истекот на мандатот на досегашните директори кои беа назначени за в.д.