„Волстрит журнал“: Белата куќа отпуштила неколку членови на Советот за национална безбедност на Трамп
Неколку членови на Советот за национална безбедност (НСЦ) биле отпуштени една недела по состанокот на претседателот Доналд Трамп со десничарската активистка Лаура Лумер, која тврдела дека некои членови не му се лојални, јави денеска „Волстрит журнал“.
На средбата одржана денеска присуствувале и потпретседателот Џеј Ди Венс, шефицата на кабинетот Сузи Вајлс и директорот на Канцеларијата за персонал Серхио Гор.
По средбата, на најмалку тројца високи претставници на НСЦ им било наредено да си заминат. Се дознава дека тоа се Брајан Волш (директор за разузнавање), Томас Будри (старешина за конгресни работи) и Дејвид Феит (старешина за технологија и национална безбедност). Точните причини за нивното отпуштање не се објавени, но Лумер јавно ја доведувала во прашање нивната лојалност. Уште двајца вработени биле отпуштени во неделата.
Овие отпуштања се случија по безбедносниот инцидент кога советникот за национална безбедност, Мајк Волц, по грешка додаде новинар во групен чат на апликацијата за пораки Сигнал, каде се дискутирало за воена операција во Јемен. И покрај повиците за негова оставка, Трамп тогаш изрази поддршка за Волц, кој засега останува на функцијата. Некои извори за весникот наведуваат дека Трамп сепак не бил задоволен од него.
Лумер, која има влијание кај Трамп, е екстремна десничарска позната по ширење на теории на заговор,и контроверзна фигура во круговите блиски на претседателот. Таа претходно предизвикала контроверзии со изјави за муслиманите, Џорџ Сорос и вакцините против Ковид.
