Вучиќ планира да се врати на функцијата премиер по предвремените избори
Српскиот претседател Александар Вучиќ најави дека, по предвремените парламентарни избори што треба да се одржат подоцна оваа година, планира повторно да ја преземе функцијата премиер на Србија.
Во интервју за „Фајненшл тајмс“, Вучиќ изјави дека ќе ги интензивира напорите за интеграција на Западен Балкан во Европската Унија, предлагајќи регионот да се третира како единствен блок во процесот на проширување.
Србија има статус на кандидат за членство во ЕУ од 2012 година, но преговорите за пристапување остануваат во застој во текот на 13-годишното владеење на Вучиќ, кој во тој период извршуваше различни највисоки државни функции. Неговите политички противници го обвинуваат за авторитарно владеење и корупција, а дел од нив ја критикуваат и Европската Унија дека не врши доволен притисок за спроведување демократски реформи во Србија.
Вучиќ се соочи со најголемиот политички предизвик во својата кариера по уривањето на натстрешницата на железничката станица во Нови Сад во 2024 година, трагедија во која загинаа 16 лица. Несреќата предизвика повеќемесечни антивладини протести низ земјата.
Во обид да ја намали политичката криза, тој најави одржување предвремени избори, а минатиот месец соопшти дека ќе се повлече од претседателската функција, која според српскиот устав има претежно церемонијална улога, но која, според критичарите, ја користеше за да го задржи влијанието врз владејачката партија и извршната власт.
Во интервјуто за „Фајненшл тајмс“, Вучиќ рече дека има намера да го исполни тоа ветување и потоа да се врати на позицијата премиер, функција што ја напушти пред десет години.
„Најверојатно, прво ќе се одржат парламентарни избори, а потоа и претседателски избори“, изјави Вучиќ, додавајќи дека парламентарните избори ќе се одржат најдоцна до почетокот на декември. „Нема простор за други одлуки“, рече тој.
Осврнувајќи се на европската интеграција, српскиот претседател го повика Брисел да се откаже од сегашниот пристап, во кој земјите се оценуваат поединечно врз основа на нивниот напредок, при што Црна Гора и Албанија во моментов се сметаат за најнапредни кандидати.
„Што сакате да изградите? Посилни граници меѓу сите? Ако сите одиме заедно, нема да има граници меѓу Приштина, Белград и останатите. Ни треба обединет регион, а не нова зона на поделби и конфликти меѓу оние што ќе влезат во ЕУ и оние што ќе останат надвор“, изјави Вучиќ.
