За ист стан земал капар од тројца луѓе, парите не им ги враќа

Процесот на договарање за купување на становите, како што велат граѓаните, траел сѐ до моментот кога купопродажниот договор требало да се однесе на нотар, при што агентот, тогаш настапувал со разни оправдувања дека не е во можност да се сретне со нив

Три лица платиле одредена сума на пари за да купат ист стан во Скопје, а во истата зграда и други граѓани платиле капар, но сè уште не можат да ги откупат целосно становите, открива МИА.

Агент за недвижности земал капар од тројца различни купувачи за еден ист стан, со што тројцата ги оштетил за вкупна сума од 11 илјади евра. Според договорите за капар до кои дојде МИА, склучени помеѓу купувачите и агентот, воочливо е дека за еден ист стан, тројца граѓани платиле капар од 5 500, 4 500 и 1 000 евра. Со капар од по 8 000 и 5 000 евра, за станови од истата зграда, се оштетени и други двајца купувачи, кои се обидуваат да си купат стан уште од минатата есен. Со 8 000 евра е оштетен и уште еден купувач кој дознава дека е измамен во март оваа година.

„Процесот на договарање за купување на становите, како што велат граѓаните, траел сѐ до моментот кога купопродажниот договор требало да се однесе на нотар, при што агентот, тогаш настапувал со разни оправдувања дека не е во можност да се сретне со нив, поради боледување, отсуство на сопственикот, и слично. Времето поминувало а купувачите биле оневозможени да пристапат кон купување на станот во кој што поскоро планирале и им било потребно да се вселат“, пишува МИА.

Бидејќи сето тоа им станало бесмислено, а агентот бил недостапен, граѓаните во потрага по одговори започнале да ги бараат и контактираат сопствениците на становите кои биле наведени во договорите, како и нотарот кој претходно им бил посочен од агентот. Стапувајќи во контакт со нив, дознале дека тие воопшто не се запознаени со случајот и дека станува збор за измама.

Контактирајќи ги гореспоменатите, по сплет на околности, петте оштетени граѓани дознаваат еден за друг, се наоѓаат и успеваат да го „измамат“ агентот, така што на 24 март се сретнуваат со него и го пријавуваат во полиција. При пријавувањето бил присутен и агентот, со што им ветил дека ќе им ги врати парите за 10 дена. Меѓутоа, и по истекот на предвидениот рок, граѓаните не ги добиле своите пари назад.

Првите пет пријави биле доставени до Секторот за економски и компјутерски криминал при Министерството за внатрешни работи на 24 март, додека, МВР, известувањето за истите го испратило до Основното јавно обвинителство на 26 март. По две недели од пријавување на случајот, до моментот на објавувањето на текстот, од ОЈО за МИА не потврдија дека се пристигнати кривичните пријави за кои покажуваме интерес.

„На 8 април, до МВР била доставена пријава и од последниот, засега шести измамен граѓанин. Во меѓувреме, додека известувањето патува од МВР до ОЈО, оштетените граѓаните велат дека лицето продолжува да измамува и бараат начин како да си ги вратат парите. Граѓаните го товарат агентот за измама според членот 247 од Кривичниот законик. Тие велат дека при обид за купување на стан, се измамени за вкупна сума од 32 илјади евра, при што секој засебно, оставил капар од по неколку илјади евра. Загрижени, бараат институциите да преземат мерки што побрзо, со цел да се спречи моменталното и понатамошно оштетување на останати граѓани“, пишува МИА.

Оштетените, во обид да дојдат до повеќе информации, велат дека се сомневаат дека агентот имал поддршка и од еден од оние кои даваат правна потврда на документите. Сепак, тоа е само сомнеж, а институциите ќе треба да истражат. Дополнително, ги зачудува фактот што за ист стан повеќе купувачи плаќаат данок, за што МИА побарала одговор и од надлежните институции.