Заев: По 30 години ќе успее проектот Чебрен вреден до 800 милиони евра

Премиерот Зоран Заев, во вечерниот дел од дебатата на седницата за пратенички прашања зборуваше за планот „Акција 21“ на Владата, со посебен акцент кон инвестициите во енергетиката.

– Една од точките на „Акција 21“, покрај животната средина е енергетиката. Нашата земја станува една раскрсница од позитивен аспект на интереси на инвеститори пред сѐ од западниот свет, пред сѐ мислам на Америка и Германија и земји нивни сојузници како Катар со нивниот течен гас, поттикнати од изградбата на интерконекторот со Грција, но и со интерконекторот со Косово и со Србија, како и вториот интерконектор којшто има проектна документација помеѓу Бугарија и Северна Македонија. Стануваме важна трансверзала во делот на енергетските инвестиции, рече Заев.

Тоа, додаде, предизвика внимание од страна на Владата да развие неколку проекти пред сѐ законска и правна регулатива за брзо привлекување и брзо инвестирање во вакви енергетски објекти.

– Најмногу мислам на фотоволтаиците и фотонапонски централи, на ветерниците, на гасни централни, на биомаса, сѐ со конечна цел да создадеме продукција во стотици и стотици мегавати кои што ќе ги заменат, би ги кажал 600 мегавати во РЕК Битола и 120 во Осломеј, објасни премиерот Заев.

Чебрен, вели тој, е најголемиот проект. Триесет години, посочи, државата на него има 11 пати неуспешност во обидите за спроведување.

– Помина првата фаза на селекција од понудите на Чебрен, 10 компании беа понудени, девет ја поминаа првата фаза со нивната капацитетност и подготвеност да градат еден мега проект вреден помеѓу 600 и 800 милиони евра со над 300, 330 мегавати. Дополнително, во моментов, во нашата држава се градат 72,5 мегавати, 10 мегавати гради ЕСМ во Осломеј, 62,5 се по пат на премии, веќе неколку пуштивме во употреба и се градат ширум државата, дел се на државно земјиште, дел се на приватно земјиште. Оди вториот дел од постапката за 100 мегавати во Осломеј каде што државата бара најмалку 10% за државата и по пат на позитивна лицитација кој ќе даде повеќе ќе ги добие можностите да биде коинвеститор во овие фотоволтаици, соопшти Заев.

Back to top button
Close