Совети за пролетно уредување на домот

– Пролетта е идеално време за освежување на домот… Со доаѓањето на потоплите денови, многумина се одлучуваат за поголеми реновирања, како што е замената на керамички плочки. Но, ако не сакате да трошите време и енергија на поголеми дела, може и со малку напор да му се даде пролетен изглед на живеалиштето

Дневната соба

Сега е време кога се мијат прозорците и теписите. Подебелите зимски килими може да ги замените со потенки, шарени теписи. Новите корнизи или завеси се исто така одличен начин за освежување на дневната соба. Различни бои и материјали, нови перничиња за креветот или нови столчиња оставаат впечаток на целосно нов простор.

Најлесен начин да ја внесете пролетта во вашата дневна соба е да додадете растенија што ќе донесат боја и свежина, или пак, нови слики – било уметнички дела или фотографии. Доколку сакате да бидете креативни, може и сами да создадете уметност.

Со потоплото време, доаѓа и реорганизацијата на гардеробите. Соберете ја зимската облека што не планирате веќе да ја носите, сè што е надминато, спакувајте го и подарете го во добротворно здружение.

Спалната, кујната, трпезаријата работната соба…

Време е да направите и промени и околу вашиот кревет – нова постелнина и ќебиња од потенки и воздушести материјали. Изберете прекривки во топли и светли бои или со цветен дезен. Дебелите ќебиња, и тешки јоргани одат во плакарот и ја чекаат есента.

Најлесен начин да ја освежите кујната или трпезариската маса е со нови јадења… Или пак, со нови чинии и чаши пастелни бои. Украсете ја масата со чаршав во цветни шари и светли бои надополнето со голема вазна со свежо пролетно цвеќе во центарот на масата. Познавачите препорачуваат лалиња.

Друг едноставен начин за пријатно украсување на кујната е – полица со зачини. Добрра организација на она што се гледа однадвор, ќе направи кујната да изгледа појасно и уредно, а полицата со зачини ќе го охрабри и готвачот во вас почесто да се впушта во нови комбинации на вкусови.

Ако работите или студирате од дома, искористете го пролетниот наплив на енергија за да го преуредите и работниот простор. Исфрлете го целиот вишок хартија и канцелариски материјали од работната маса и препуштете му се на минимализмот. Ако просторот околу вас е подобро организиран и без вишок работи, ќе бидете попродуктивни и ќе имате помалку работи коишто непотребно ви го одвлекуваат вниманието. Една креативна идеја е и тоа –  да ги преуредите полиците за книги според бојата на корицата. Така, книгите ќе послужат и како убав украс на просторот.

За да бидете ефективни и сосредоточени, важно е да имате доволно светлина на местото предвидено за работа. Ставете ја работната маса што е можно поблиску до прозорецот. А, ако ова не е можно, поставете подна ламба покрај работната маса или закачете светилка на блискиот ѕид. Но, важно е светлото да биде насочено во книгата или тастатурата, затоа што при слаба осветленост лошо влијае на очите, што може да доведе до главоболки, недостаток на енергија и послаби работни способности.

Балкон или тераса

Пролетта носи подолги и потопли денови. Дали има подобро од тоа да се седи на балкон со кафе и „порција“ сончевите зраци? Украсувањето на балконот или терасата по свој вкус ќе ги претвори во совршено место за опуштање. Покрај нова маса и столови, допир на пролетта можат да донесат украсни перници во разни бои. За да има вистинска пролетна зелена оаза, украсете го просторот со растенија, а за максимална релаксација, нема да ви пречи лежалка за секој ваш слободен миг.