Марија Јаничевска е предлогот за директорка на ОТА
Членовите на Комисијата за прашања на изборите и именувањата, на предлог на Комисијата, денеска едногласно ја донесоа одлуката Марија Јаничевска да биде директор на Оперативно-техничката агенција (ОТА).
Образложувајќи го предлогот, претседателката на Комисијата, Марија Георгиевска, посочи дека Јаничевска е родена 1978 година во Скопје и дека била државен советник за општи работи во ОТА, а прочита и други детали од нејзината биографија.
Како што информира Георгиевска, за функцијата директор на ОТА се пријавило 21 лице.
Одлуката за распишување на оглас за избор на нов директор на ОТА, Собранието ја изгласа на 5 септември, на само два дена пред истекот на петгодишниот мандат на претходниот раководител Зоран Ангеловски, а утредента беше објавена во „Службен весник“.
За директор на ОТА, како што беше наведено во огласот, согласно Законот со кој е уредена надлежноста и работата на оваа независна државна институција, може да биде избрано лице кое е државјанин на Република Северна Македонија, кое има стекнато најмалку 240 кредити според ЕКТС, односно VII/1 степен на образование во областите информатика, електротехника, компјутерска техника и информатика, телекомуникациско инженерство, безбедност, компјутерска безбедност, правни или економски науки. Исто така, се бараше и минимум десетгодишно работно искуство во овие области по завршеното образование.
ОТА од почетокот на септември е без директор, со што е оневозможено нејзиното функционирање. Претходниот директор Ангеловски уште тогаш предупреди дека, доколку набрзо не се избере директор, тоа ќе создаде правен вакуум во раководењето со институцијата.
„Во Законот за Оперативно-техничка агенција (‘Службен весник на Република Македонија’ број 71/18 и ‘Службен весник на Република Северна Македонија’ број 98/19), иако се уредени повеќе прашања поврзани со надлежностите и раководењето на ОТА, не е уредено прашањето за раководењето на институцијата по истекот на времетраењето на мандатот на директорот од пет години, во случај кога на денот на истекот на мандатот сè уште не е завршена постапката за избор на нов директор, односно важечкиот закон не предвидува можност во тој случај кога истата е без легитимно избран директор со важечки мандат од страна на Собранието на РСМ, со институцијата да раководи друго лице (в.д. директор, заменик-директор, совет и слично), а со тоа ниту да се даваат овластувања за спроведување на законските надлежности на ОТА кои произлегуваат од директорот како единствено надлежно раководно лице“,
изјави Ангеловски за „360 степени“.
Оперативно-техничката агенција (ОТА) како самостоен и независен државен орган беше формирана по реформите во безбедносно-разузнавачкиот сектор, односно поранешната Управа за безбедност и контраразузнавање (УБК) по скандалот со масовното прислушување и Извештајот на експертската група на Европската комисија (ЕК) на чело со Рајнхард Прибе.
Со серија законски измени што ги уредуваа овие прашања и за кои беше потребно двотретинско мнозинство, УБК доби свој наследник во Агенцијата за национална безбедност (АНБ), која задржа (голем) дел од надлежностите, додека ингеренциите врз опремата и уредите за прислушување преминаа во ОТА.
