Кривична за Фатмир Етеми еден од најкрупните играчи во македонскиот бизнис

Полицијата поднесе кривична пријава против еден од најкрупните играчи на македонскиот пазар. Бизнисменот кој е распространет во повеќе сектори но доминира во градежништвото падна за злоупотреби при тргување со акции. Имено тој како дел од раководството на една банка, ја дознал висината на дивидендата и заедно со своето семејство купил дополнителен број на акции

На ден 10.10.2024 година, Одделот за сузбивање на организиран и сериозен криминал, Единица за  финансиски криминал во соработка со Одделот за криминалистичка полиција, поднесе кривична пријава против лицето Ф.Е. од Скопје, за сторено кривично дело „Измама при работењето со хартии од вредност и удели по чл. 275 ст. 3 од КЗ.
Пријавениот во својство на член на Надзорен одбор на банка од Скопје,  злоупотребил внатрешна информација која се однесува на висината на дивидендата за 2023 година, која како член на надзорен одбор ја дознал во текот на 2024 година. На тој начин користејќи ja ценовно чувствителнaта информација истиот се стекнал со 500 обични акции, по просечна цена на чинење на акција од 16.400,00 денари или вкупно за акциите платил 8.200.000,00 денари.

Кривично пријавениот сензитивните информации ги пренел и на трети лица поточно на членови на негово потесно семејство со што истите ја искористиле информацијата на начин што купиле 701 хартија од вредност (акција) на банката, по цена пониска од цената која што ја достигнала хартијата од вредност (акција). Односно за акциите биле вкупно платени вкупен износ од 11.520.967,00 денари, а овозможило да се стекнат со вкупна корист од 639.000,00 по основ на ценовната промена на акцијата како и вкупно 646.100,00 денари по основ на дивиденда. Со ова лицето Ф.Е прибавил противправна имотна корист за себе и за членовите на неговото семејство и на тој начин сторил кривично дело „Измама при работењето со хартии од вредност и удели по чл. 275 ст. 3 од КЗ – се вели во информацијата од полицијата