Захарова: Руската делегација пристигна во Истанбул, подготвена за сериозни разговори

Портпаролката на руското Министерство за надворешни работи Марија Захарова денеска потврди дека руската делегација пристигна во Истанбул, каде се планирани разговори за решавање на конфликтот во Украина, пренесоа руските медиуми.

– Како што е речено во повеќе наврати, руската страна е подготвена за сериозни преговори, а делегацијата на Русија пристигна во Истанбул и е подготвена за сериозна работа, истакна таа на прес-конференција во Москва.

Захарова потсети дека рускиот претседател Владимир Путин на 11 мај изнесе иницијатива за продолжување на директните преговори меѓу двете страни, предлагајќи преговорите да почнат без одлагање и предуслови со цел да се елиминираат суштинските причини за конфликтот и да се тргне кон воспоставување долгорочен, траен мир.

Руската делегација ја предводи помошникот на Путин, Владимир Медински, кој веќе ја предводеше групата руски преговарачи во Истанбул, во пролетта 2022 година кога беа прекинати директните преговори меѓу двете страни.

Во меѓувреме, украински официјален претставник изјави дека украинскиот претседател Володимир Зеленски денеска треба да се сретне со турскиот претседател Реџеп Таип Ердоган, по што ќе донесе одлука за учество во разговорите со руската делегација во Истанбул.

Во Истанбул за денеска се закажани преговори меѓу делегациите на Русија и Украина за прекин на огнот, за кои не е прецизирано кога ќе почнат.

Фото: Анадолија