(ВИДЕО) Вучиќ: Во 2000 година на власт дојдоа најлошите, а сега дојдоа уште полоши од нив!

Опозицискиот лидер Александар Вучиќ, изјави дека веќе три дена се спроведува револуционерен терор и нагласи дека ќе продолжи да им се спротивставува на оние кои, како што рече, ѝ нанеле зло на оваа земја во изминатите две години.

Сите оние кои никогаш ништо не постигнале во животот, а се сметале себеси за многу важни и одлучиле да живеат на грбот на чесните и нормални луѓе. Од упадот во телевизија – што, како што изгледа, било организирано од некој друг – преку упадот во ’Србијаводе‘, па сè до прекинувањето на свештениците додека читаа молитва – сето тоа се работи за кои многумина не ни сонувале дека можат да се случат. Ова веќе го доживеавме во 2000 година. Тогаш на власт дојдоа најлошите, а сега дојдоа уште полоши од нив“, рече Вучиќ во видео-објава на Инстаграм.

Тој додаде дека тие веруваат оти можат да ги скршат луѓето со закани – и навистина скршиле многумина, а ќе скршат и уште повеќе – но дека никогаш нема да ја скршат неговата волја.

„Гледам како луѓето со кои соработував пет, десет или петнаесет години полека се оддалечуваат; секој од нив има причина да биде лут или навреден, и секому нешто му недостасува. Тоа не го забележував во сите изминати години – а немаше да го забележам ниту ако победевме на изборите. Но, ете, тоа го научив за луѓето, а тоа никогаш нема да ја промени мојата волја“, рече Вучиќ.

Тој додаде дека секогаш се обидувал на сè да одговори на пристоен начин, додека неговите политички противници ги погазиле сите свои ветувања уште три дена по изборите.

„Денес, Јово Бакиќ – кој сам се кандидираше за министер, бидејќи не верувам дека некој сериозен би го поставил за министер за внатрешни работи – погази едно од ветувањата, исто како што во овие три дена ги погазија сите свои ветувања“, изјави Александар Вучиќ.

Тој рече дека тие изјавиле оти сакаат враќање на институциите, на државата и на довербата во институциите, а притоа не спасиле ниту една институција, туку, како што наведе, почнале да ја уништуваат секоја од нив.