Белата куќа: Договорот за ТикТок ќе биде потпишан „во наредните денови“

Белата куќа соопшти дека се очекува договорот за американскиот бизнис на платформата за споделување кратки видеа ТикТок да биде потпишан во наредните денови.

Портпаролката на Белата куќа, Каролин Левит, за американскиот телевизиски канал Фокс Њуз изјави дека деталите за иднината на апликацијата во САД „веќе се договорени“.

-Сега само треба да потпишеме договор и тоа ќе се случи. Очекувам дека тоа ќе се случи во наредните денови, рече Левит.

Компанијата-мајка на ТикТок, „Бајтденс“ (ByteDance) со седиште во Пекинг, се соочува со месеци неизвесност околу работењето на апликацијата во САД, каде што има околу 170 милиони корисници.

Американските претставници изразија загриженост дека кинеската влада би можела да добие пристап до огромни количини лични податоци и да ја користи платформата за вршење политичко влијание. ТикТок и „Бајтденс“ го негираа ова.

Левит рече дека според договорот, ТикТок ќе биде „во мнозинска сопственост на Американци во САД. Ќе има седум места во одборот на директори што ја надгледува апликацијата во САД, а шест од тие места ќе бидат американски“.

-Податоците и приватноста ќе бидат водени од една од најголемите американски технолошки компании, „Оркал“ (Oracle), а алгоритмот исто така ќе биде контролиран од Американци, продолжи Левит.

Според законот донесен минатата година, американскиот бизнис на ТикТок мораше да се продаде на „Бајтденс“ или да се исклучи до 19 јануари. Трамп се согласи на одложување откако ја презеде функцијата во јануари, постојано одложувајќи ја неговата имплементација и покрај тоа што немаше законска основа за тоа.

Во САД, „Бајтденс“ – а со тоа и ТикТок – се сметаат за кинески компании. „Бајтденс“ возвраќа дека компанијата е 60 проценти во сопственост на меѓународни инвеститори и е со седиште на Кајманските Острови.