Лувр останува затворен и денеска
Најпосетуваниот музеј во Франција, Лувр, ќе остане затворен и денеска по вчерашниот грабеж, соопшти портпаролот на музејот.
Францускиот министер за правда, Жералд Дарманен, призна дека имало безбедносни пропусти во заштитата на Лувр, кои им овозможиле на крадците вчера да украдат кралски накит среде бел ден од познатиот париски музеј.
– Она што е сигурно е дека потфрливме, бидејќи луѓе успеале да паркираат лифт за мебел во центарот на Париз, да се качат со него за неколку минути, да украдат бесценет накит и да ѝ дадат на Франција ужасна слика, изјави тој за радио „Франс Интер“.
Францускиот претседател Емануел Макрон претходно изрази увереност дека експонатите украдени од Лувр ќе бидат пронајдени и оти сторителите ќе бидат изведени пред лицето на правдата.
Макрон на X напиша дека кражбата извршена во Лувр е напад врз ценетото културно и историско наследство на Франција.
Францускиот претседател изјави дека се преземаат сите активности за фаќање на сторителите и враќање на експонатите, и дека целиот процес го води канцеларијата на парискиот обвинител.
Макрон истакна дека новиот проект за модернизација на Лувр, кој беше претставен во јануари, ќе овозможи зголемена безбедност и ќе гарантира зачувување и заштита на француската култура.
