Трамп во писмо до израелскиот претседател Херцог побара да го помилува премиерот Нетанјаху

Израелскиот претседател Исак Херцог доби писмо од американскиот претседател Доналд Трамп во кое го повикува да ја разгледа идејата за помилување на премиерот Бенјамин Нетанјаху, објави денеска неговиот кабинет.

Против Нетанјаху веќе неколку години се водат три одделни судски предмети поради наводна корупција, а Трамп постојано бара негово помилување.

„Иако апсолутно ја почитувам независноста на израелскиот судски систем и неговите барања, верувам дека овој „случај“ против Биби, која долго време се бори заедно со мене – меѓу другото, против многу силниот непријател на Израел, Иран – е политички, неоправдан прогон“, напиша Трамп во писмо до израелскиот претседател.

Канцеларијата на Херцог соопшти дека секој што бара претседателско помилување мора формално да го побара тоа, во согласност со постојните процедури, пренесуваат британските медиуми.

Трамп, исто така, прошка за Нетанјаху побара и за време на неговата посета на Израел во октомври, во говор пред израелскиот Парламент( Кнесетот) .

Лидерот на израелската опозиција, Јаир Лапид, одговори на повикот на Трамп со „потсетување“ дека израелскиот закон предвидува дека првиот услов за помилување е „признание на вина и изразување каење“.

Претходно годинава, Лапид, „со должно почитување кон Трамп“, нагласи дека „никој не треба да се меша во правниот процес на независна држава“ и ја нарече иницијативата на американскиот претседател „компензација“ за Нетанјаху за притисокот врз него да ја запре војната во Газа.

„Тоа е типичен Трамп“, рече Лапид во таа прилика.