Бош најавува масовни отпуштања: профитот речиси преполовен, 20.000 работни места под закана

Германскиот индустриски гигант Бош потврди план за укинување на околу 20.000 работни места, откако компанијата минатата година забележала речиси двојно намалување на профитот. Овој потег е уште еден сигнал за зголемениот притисок врз некогаш доминантниот германски производствен сектор и дополнително ја зголемува одговорноста врз политичарите во Берлин да понудат одржливо решение.

Официјалните податоци покажуваат дека стапката на невработеност во Германија пораснала на 6,6 проценти, што е највисоко ниво во последните 12 години, додека бројот на невработени во јануари надмина три милиони лица.

„Економската реалност јасно се одразува во нашите резултати“, изјави извршниот директор на Бош, Штефан Хартунг, опишувајќи ја 2025 година како „тешка и, во одредени сегменти, болна“ за компанијата, која е еден од водечките светски добавувачи на автомобилски компоненти, пренесува Политико.

Автомобилската индустрија во слободен пад

Најавените отпуштања доаѓаат во време на длабока криза во германската автомобилска индустрија, која со децении беше столб на националната економија. Секторот забрзано губи работни места, а студија на консултантската куќа EY од 2025 година покажува дека само лани во Германија биле укинати повеќе од 50.000 работни места во автомобилската индустрија.

Падот на овој сектор се претвори во голем политички тест не само за германската влада, туку и за Европа во поширок контекст. Поранешниот „скапоцен камен“ на економијата сега се соочува со сериозни предизвици – од актуелните политики за електрични возила, преку високите трошоци за енергија, до агресивната конкуренција од кинеските производители.

Со сè помасовните отпуштања и одложувањето на клучни инвестициски одлуки, владата на канцеларот Фридрих Мерц е под растечки притисок од работниците, синдикатите и индустриските лидери да ја преиспита германската индустриска стратегија. Во исто време, во Германија и низ Европа сè погласно се поставува прашањето дали земјата ќе успее да ја задржи својата улога на економска сила во наредните години.

Извор: trn.mk