Алиу: Подготвивме значајни измени на Законот за здравствената заштита, сите засегнати страни имаат можност да достават предлози на ЕНЕР
Министерството за здравство информира дека подготви повеќе важни измени и дополнувања на Законот за здравствената заштита, кои неделава се поставени на Единствениот национален електронски регистар на прописи (ЕНЕР). Сите засегнати страни имаат можност да достават свои сугестии и предлози, кои ќе бидат разгледани во согласност со утврдената процедура.
Министерот за здравство Азир Алиу појаснува дека сите забелешки, мислења и сугестии ќе бидат земени предвид во финалната верзија на новиот предлог-закон за здравствена заштита.
– Се водиме од принципите на транспарентност и отчетност и сите конструктивни забелешки, мислења и сугестии ќе бидат земени предвид во финалната верзија на новиот предлог-закон за здравствена заштита. Од досегашната примена на законот произлезе потребата да се направат измени и дополнувања во делот на постапката за вработување здравствени работници и соработници во ЈЗУ, статусот на директорите на јавните здравствени установи, специјализациите и супспецијализациите, како и условите за пензионирање на здравствените работници и работа по пензионирањето, како и усогласување со други прописи – изјави министерот Алиу.
Меѓу позначајните предлог-законски измени, како што се наведува, е приоритетното вработување на најдобрите по успех дипломирани доктори на медицина на медицинските факултети во нашата држава. За нив, доколку се пријават на оглас за вработување, нема да се спроведува постапка за селекција на кандидат, туку тие приоритетно ќе се вработуваат во јавната здравствена установа. Во постапката за вработување предвидено е составот на комисијата за селекција на кандидатите да го предлага стручниот колегиум на установата за секое огласено работно место посебно. Во согласност со резултатите од постапката за вработување, директорот е должен да го вработи најдобро рангираниот кандидат.
– Со цел правилно планирање на потребите за специјалистичките и супспецијалистичките кадри во државата и можностите за спроведување на специјализациите и супспецијализациите, во иднина Владата, покрај програмите за државни специјализации и кофинансирани специјализации, ќе донесува и програма со која ќе се определи бројот на приватни специјализации, односно супспецијализации, соодветно на потребите за медицински кадри. Исто така, се зголемува и возраста за ангажирање искусни кадри доктори на медицина од дефицитарни специјалности/супспецијалности и искористување на нивната стекната стручност. За овие лица се овозможува од 67 години до навршување 70 години возраст со договор да бидат ангажирани во здравствени установи во мрежата и да ја задржат пензијата. Ангажирањето ќе биде врз основа на согласност од Министерството за здравство и Фондот за здравственото осигурување доколку нема повеќе услови за извршување на определена здравствена дејност или за извршување на непрекината дејност – додава министерот Алиу.
