ХРВ бара истрага за убиството на либанската новинарка Амал Халил

Организацијата „Хјуман рајтс воч“ (ХРВ) побара истрага за смртта на либанската новинарка Амал Халил, која вчера беше убиена при израелски напад.

– Новинарите кои известуваат се заштитени како цивилите според меѓународното право и не смеат да бидат мети. Намерните напади врз цивили претставуваат воени злосторства – изјави истражувачот на ХРВ за Либан, Рамзи Каис.

Тој наведе и дека во 2023 година израелската армија го убила либанскиот новинар Исама Абдулах и тоа останало неказнето, поради што убиствата на новинари во Либан „се повторуваат повторно и повторно“.

Халил е убиена, а нејзината колешка Зеинаб Фараж е повредена при израелскиот воздушен напад врз селото Ал Тири во јужен Либан. Тие известувале за израелски напад врз возило при што беа убиени две лица, но нападите продолжиле, а тие се засолнале во куќа која била погодена.

Либанското Министерство за здравство соопшти дека спасувачите кои се обиделе да стигнат до новинарките биле спречени од израелски оган и беа принудени да се повлечат. Телото на Халил било пронајдено околу полноќ, седум часа по нападот.