Недостиг на гориво во Русија: Најмалку 15 региони воведоа ограничувања на продажбата
Најмалку 15 руски региони воведоа ограничувања за продажба на бензин и дизел поради сè поголемиот недостиг на гориво, состојба што дополнително се влошува по украинските напади со беспилотни летала врз нафтените рафинерии.
Според украински медиуми, минатонеделниот напад врз Московската рафинерија, една од најголемите во земјата, довел до прекин на нејзината работа. Овој капацитет обезбедува околу 40 проценти од потребите на московскиот пазар и поголемиот дел од регионот.
Иако воведоа ограничувања, руските власти ја минимизираат поврзаноста на состојбата со војната во Украина. Повеќето функционери тврдат дека мерките имаат цел да спречат создавање „вештачки недостиг“ на гориво.
Во Белгородската област, на пример, граѓаните на бензинските станици на „Лукоил“ можеле да купат најмногу 30 литри бензин или 60 литри дизел, додека на станиците на „Роснефт“ била ограничена продажбата во канистри. Компанијата „Газпром Нефт“ во оваа област престанала со продажба на бензин од типот АИ-95.
Покрај Белгородската, ограничувања се воведени и во Иркутската, Брјанската, Курската, Новосибирската, Саратовската, Тјуменската, Пензенската, Воронежската, Мурманската, Владимирската и Омската област, како и во Ханти-Мансискиот автономен округ, Република Северна Осетија-Аланија и Краснојарскиот крај.
Рускиот вицепремиер Александар Новак изјави дека состојбата со горивото е „сложена, но под контрола“. Тој посочи дека Русија размислува за воведување забрана за извоз на дизел, додека извозот на бензин е забранет уште од март годинава.
Претседателот Владимир Путин, пак, изјавил дека ѝ наложил на Владата да преземе мерки за намалување на последиците од украинските напади врз енергетската инфраструктура.
Од украинска страна, рафинериите се сметаат за легитимни воени цели, бидејќи, според Киев, тие обезбедуваат гориво за руската воена машинерија.
Недостигот на гориво веќе неколку недели се чувствува и на анектираниот Крим, каде што исто така се во сила ограничувања за продажба.
