Тројца загинати и 13 повредени во руски напад врз предградие на Харков; Украина погоди три нафтени складишта во Ставрополскиот крај

Три лица загинаа, а 13 се повредени во најновиот напад на руските сили врз предградие на Харков. Истовремено, украинските сили извршија масовни напади со беспилотни летала врз три нафтени складишта во рускиот Ставрополски крај и врз танкери од таканаречената руска „флота во сенка“.

„Непријателот нападна предградие на Харков. Според првичните информации, три лица загинаа, а уште 13 се повредени како последица на нападите“, соопшти началникот на Харковската обласна воена администрација, Олег Синегубов, во објава на социјалната мрежа „Телеграм“. Тој додаде дека сите служби за итна помош во моментов работат во засилен режим на терен.

Укринформ претходно објави дека бројот на повредените цивили во синоќешниот напад со руски беспилотни летала врз градот Изјум се зголемил на 17 лица.

Во меѓувреме, беспилотни летала на Службата за безбедност на Украина (СБУ) и на вооружените сили погодија стратешки енергетски цели длабоко на руска територија.

„Единици на СБУ истовремено погодија три нафтени складишта во Ставрополскиот крај, додека единици на нашите вооружени сили нападнаа уште еден објект за гориво во истиот регион“, напиша украинскиот претседател, Володимир Зеленски, на платформата „Икс“. Тој додаде дека во Црното Море биле успешно погодени и три руски танкери кои се дел од „сенчестата флота“.

Според извештаите на Укринформ, нападнатите цели во Русија се наоѓале на околу 600 километри од украинската државна граница. По ударите избувнале големи пожари на сите три нафтени објекти, при што биле регистрирани силни експлозии и запалување на резервоари со погонско гориво и со мазива