Давел момче и му предизвикал потрес на мозокот. 20 -годишник претепал уште две деца во училишен двор

Основното јавно обвинителство Скопје нареди истражна постапка против 20-годишен скопјанец осомничен за продолжено кривично дело насилство, а надлежниот јавен обвинител до судијата на претходна постапка достави предлог да му се определи мерка притвор.​

Како што информира државното Јавно обвинителство, на 9 септември пред средно училиште и кафе-бар во Кисела Вода, осомничениот со умисла извршил две временски поврзани дејствија што претставуваат повеќекратно остварување на исто дело, искористувајќи исти прилики, односно сторил грубо насилство врз три деца.

-Додека едно од оштетените 15-годишни деца седело во кафе-барот заедно со неговите соученици, осомничениот влегол заедно со уште две непознати лица, го фатил детето за вратот и насилно го извадил надвор. Давејќи го за врат, го однел до подземни гаражи во непосредна близина и со тупаница го удрил по лицето, нанесувајќи му тешки телесни повреди – фрактура на два предни заба, набиеници на усните и потрес на мозокот. Потоа осомничениот во придружба на другите две лица влегол во дворот училиштето, се приближил до уште две 15-годишни деца, удирајќи ги со шлаканици и со тупаница и нанесувајќи им телесни повреди. Осомничениот со насилството предизвикал чувство на страв и несигурност кај присутните ученици и кај други сведоци на настанот, соопшти Обвинителството.

Бидејќи постојат околности што укажуваат на опасност од бегство, наведува ЈОРСМ во соопштението, постои основан страв дека осомничениот ќе ја попречува кривичната постапка со влијание врз сведоците и особени околности кои го оправдуваат стравот дека ќе стори кривично дело со кое се заканува, надлежниот јавен обвинител до судијата на претходна постапка достави предлог за определување мерка притвор.