ДУИ: „Вреди“ ги нарекува албанските административци мувлосани

Не поминува ден без скандал, велат од Демократската унија за интеграција (ДУИ) и додаваат дека се шокирани од, како што велат – „секојдневните навреди од Вредните вазали“, алудирајќи на владејачката коалиција „Вреди“.

Поточно, ДУИ реагира на вчерашното соопштение на „Вреди“ во кое велат дека „мувлата на ДУИ ја има во државните институции и се обидува да ја опструира работата на Владата и порачаа дека „таа мувла ќе биде искоренета“.

„Демократската унија за интеграција е шокирана од секојдневните навреди на Вредните вазали, поразени на претседателските и парламентарните избори, кон административците Албанци во државните органи, нарекувајќи ги мувла, мувлосани. Претходно Таравари ги нарече носачи на бурек Македонците, а денес секој Албанец администратор е мувлосан“,велат од ДУИ.

Од ДУИ сметаат дека „Вреди“ ги понижуваат Албанците.

„Нема граница на понижувањето што можеа да им го направат на Албанците вмровците од ‘Влен’. Го негираа знамето, химната само делумно, јазикот, војната, ОВК, Охридскиот договор, легитимитетот, нивните потписи на хартија, нивните изјави дека ако загубат ќе си поднесат оставки, сите нивни изборни ветувања и веќе прејдоа и кон навреди на Албанците во институциите“, смета ДУИ.

Инаку, вчера од „Вреди“ соопштија дека ДУИ има послушници во повеќе институции со цел „да ја спречат испораката на правдата“.

„Мувлата на ДУИ во државните институции има добиено наредба да ја опструира на секој можен начин работата на новата влада. По 22 години режим, тие оставија свои послушници во правосудството, дипломатијата, безбедносните служби, ресорните министерства, државните институции и медиумите. Нивната деструктивна агенда вклучува обиди за нарушување на билатералните односи со Косово, Бугарија, Грција, со цел да го попречат нашиот пат кон ЕУ. Тие преку своите инсталации поставуваат пречки во системот за да ја спречат испораката на правдата, а нивните мегафони се задолжени да создаваат хистерија“,соопштија од „Вреди“.