Европратениците претпладнево ќе гласаат за извештајот за Србија

Европратениците претпладнево ќе гласаат за извештајот за Србија, кој по гласањето ќе има форма на резолуција, што не е правно обврзувачка.

Во Европскиот парламент доцна синоќа беше разгледан извештајот за Србија, поднесен од известителот за Србија, Тонино Пицула, усвоен од Комитетот за надворешни работи на ЕП во април.

Презентирајќи го извештајот, Пицула повтори дека целокупното темпо на преговорите за пристапување на Србија со ЕУ ќе зависи од опипливиот напредок во основните вредности, владеењето на правото, посветеноста на заедничките европски права и вредности, како и усогласувањето со заедничката надворешна и безбедносна политика на ЕУ и дијалогот меѓу Белград и Приштина, „што треба да се води со добра волја за да се обезбеди правно обврзувачки договор заснован на меѓусебно признавање“.

Падот на бетонската настрешница во Нови Сад стана трагичен симбол на системска корупција, непотизам и несоодветни контролни механизми што треба да ги заштитат граѓаните, а не го прават тоа, нагласи известителот за Србија, Тонино Пицула, во својот прв извештај за Србија до Европскиот парламент.

Медиумите генерално не се слободни или достапни за секого, Регулаторното тело за медиуми не функционира, судството ја дели правдата селективно и ги изложува оние кои посочуваат проблеми на јавни напади, наведе тој за политичката ситуација во Србија.

Според него, личните податоци на оние што протестираат се објавуваат јавно.

„Против нив се користат неидентификувани нелегални средства, што потоа ги истражуваат руските служби. Граѓаните на Европската унија се притвораат и протеруваат од земјата поради нивниот статус на социјалните мрежи, а земјите-членки на ЕУ и нивните претставници се обвинети дека стојат зад таканаречената обоена револуција“, рече тој.

Покрај тоа, Србија упорно одбива да се усогласи со геополитичката ориентација на Европската Унија и да воведе санкции против Русија, додаде тој.

„Недостасува гаранција за независноста на клучните институции, вклучително и РЕМ, и за целосното спроведување на сите препораки на ОБСЕ и Советот на Европа за изборна реформа, во транспарентен и инклузивен процес. Секако, пред нови избори, кои би биле од клучно значење, Комисијата го нагласува сето ова во својот план за реформи“.

Економските податоци, иако подобрени, не можат да бидат единствената мерка за успех, рече Пицула.

„Економскиот раст често се базира на нетранспарентни договори, кои се ослободени од примената на законот за јавни набавки. Ваквите договори, покрај економските, имаат и директно политичко влијание“, додаде тој.

„Во исто време, изјавите на српскиот лидер за формална посветеност на европските интеграции звучат навистина неверојатно, додека оваа недела тој планира патување во Москва и нови енергетски договори со Русија, а на повидок нема никакви потребни реформи што се клучни за успешен европски пат“, рече Пицула.

Тој им се обрати на српските студенти кои трчаат во Стразбур, а потоа во Брисел.

„Ја ценам нивната жртва и борба. Јасно можам да ги чујам нивните пораки од самиот почеток, а во извештајот ги нагласувам истите цели за кои и тие се залагаат. Бидејќи тие, како млади луѓе, ја претставуваат иднината на својата земја, ставот на владата кон нив кажува многу повеќе за иднината отколку која било партиска програма“.

Еврокомесарката за проширување Марта Кос изјави дека ЕК е подготвена да ја поддржи Србија на нејзиниот пат кон членство и додаде дека за време на нејзината неодамнешна посета на Србија разговарала со многу луѓе и ѝ ја пренела истата порака – дека земјата има историска можност да се приклучи на ЕУ.

„Реформите се неопходни во корист на српските граѓани и тоа е она што го бараат граѓаните на Србија. Го поздравувам повторното распишување на избори за Советот на РЕМ, тоа е клучен чекор кон враќање на довербата“, рече таа.

„Сакаме демократска и просперитетна Србија во ЕУ“.

За време на дебатата, европратениците најмногу зборуваа за студентските протести во Србија, ги критикуваа властите во Белград, особено поради најавеното заминување на српскиот претседател Александар Вучиќ во Москва на воена парада по повод Денот на победата.