Ивица Коневски: Мицкоски е единствениот одговорен за поразите на ВМРО-ДПМНЕ
Лидерот на ВМРО-ДПМНЕ, Христијан Мицкоски е единствениот одговорен за изборните порази на партијата, изјави поранешниот градоначалник на Аеродром, Ивица Коневски.
Во гостување на „Топ Тема“ на ТВ Телма, Коневски, кој е еден од најистакнатите претставници на Инцијативниот одбор (ИО) за свикување на вонреден конгрес на ВМРО-ДПМНЕ, потенцира дека оваа иницијатива добива сè поголема поддршка меѓу партиското членство.
– Прашањето веќе е или тој или партијата. Мицкоски знае дека ја има изгубено довербата кај делегатите што го гласаа, знае дека треба да излезе пред нив и да се заблагодари за поддршката и да ги презентира сите аргументи кои доведоа до пораз на изборите, истакна Коневски, додавајќи оти е оптимист за одржување на вонреден Конгрес на партијата.
Тој нагласи дека не брзаат со свикување на Конгресот, затоа што сакаат да го почекаат завршувањето на локалните избори во Штип и во Пласница, за да не му понудат на Мицкоски уште едно алиби за евентуален неуспех.
– Ние имаме можност да го свикаме, но целта ни е да ги обединиме сите, иако со две третини од делегатите можеме да организираме Конгрес и да ги собереме сите и тоа да биде свечен чин, вели
Коневски.
Тој вели дека засега нема амбиции да биде нов лидер на ВМРО-ДПМНЕ, додавајќи дека сега е битно да дојде до повторно обединување на разединетата партија.
