Клиниката „Жан Митрев“ со намалени цени: Наместо 12 000 евра, лекувањето од ковид-19 ќе чини 6 000 евра
Клиничката болница „Жан Митрев“ од денеска ги намалува цените за лекување на пациенти болни од ковид-19, па како што наведуваат оттаму, наместо 12 000 евра, пациентите кои отсега ќе се лекуваат 10 дена на полуинтензивна нега ќе платат 6 000 евра, додека, пак, оние кои се преземени во сериозна здравствена состојба од други институции ќе платат 8 000 евра.
Таму е наведено и дека капацитетите на болницата во континуитет се полни и дека има листа на чекање.
– Во моментов се хоспитализирани околу 100 тешко болни пациенти од кои 40 на респираторна поддршка. За негата на овие пациенти се грижи комплетниот лекарски тим кој како и сите здравствени работници во државава е веќе преморен. Во процесот на нега во нашата болница се вклучени и дел волонтери од немедицинскиот персонал, со цел да им помогнат на своите колеги. Сепак, за да помогнеме секаде каде што е потребно и можеме, еден од нашите лекари ќе биде прераспределен согласно барањата на Министерот за здравство. Оваа прилика ја користиме за да апелираме до пошироката јавност и да ги повикаме сите оние кои се чувствуваат способни да помогнат и би сакале да волонтираат, да се пријават. Ќе бидат соодветно едуцирани и вклучени во нашите процеси. Искрено се надеваме дека наскоро на пандемијата ќе и дојде крајот, а во меѓувреме потребно е сите да останеме максимално дисциплинирани, посветени и да се вложиме како поединцни во справувањето со последиците за доброто на сите, наведено е во соопштението.