Лајен: Денеска испораки, утре почнува вакцинацијата низ цела ЕУ

Претседателката на Европската комисија, Урсула фон дер Лајен, упати видеопорака до граѓаните на Европа по повод почетокот на испораката на првите вакцини против Ковид-19 во ЕУ.

– Денеска е ден на испорака, а утре ќе почнеме со вакцинирање низ цела ЕУ – рече фон дер Лајен.

Урсула фон дер Лајен нагласи дека ЕУ набавила доволно вакцини за 450 милиони нејзини граѓани и оти во исто време им се достапни на сите членки на ЕУ.

Според неа, европските денови на вакцинација, од 27 до 29 декември, ќе бидат емотивен момент на единство и европски успех.

– Вакцинацијата ќе ни помогне постепено да се вратиме во нормалниот живот. Кога ќе се вакцинираат доволно луѓе, ќе можеме повторно да патуваме, да се среќаваме со пријателите и семејството и да имаме нормални празници – истакна фон дер Лајен.

Таа предупреди дека дотогаш сите мора да останат внимателни за да се заштитат себе си и другите од вирусот.

– Ајде сите заедно да останеме безбедни и 2021 година да ја направиме година на европско закрепнување и надеж – рече фон дер Лајен.