ОН: Речиси 500 цивили загинаа во конфликтот меѓу Авганистан и Пакистан на авганистанска страна
Речиси 500 цивили беа убиени на авганистанска страна во прекугранични напади од страна на Пакистан и Авганистан од октомври минатата година до крајот на јуни оваа година, објавија денеска Обединетите нации (ОН).
Во извештајот за состојбата со човековите права, Мисијата на ОН за помош во Авганистан (УНАМА) соопшти дека документирала 499 убиени цивили и 1.216 ранети во судирите што продолжуваат и покрај меѓународните напори за нивно потиснување.
Извештајот, исто така, забележува и за злоупотреби на човековите права, како што се потиснувањето на протестите во Авганистан и декрети за легализирање на детските бракови.
Конфликтот меѓу Пакистан и Авганистан се интензивираше во февруари, кога армијата на Кабул ја нападна пакистанската територија, а Исламабад објави дека е во „отворена војна“.
Во најсмртоносниот напад од конфликтот, пакистанските сили во март нападнаа центар за лекување на зависности во Кабул, убивајќи стотици цивили, што според Амнести Интернешнл може да се истражи како воено злосторство.
Пакистан не го објави вкупниот број на цивилни жртви на своја територија.
Како одговор на извештајот од мисијата на УНАМА, Министерството за надворешни работи на Пакистан изјави дека талибанската влада на Авганистан „продолжува да одржува средина погодна за серија (милитантни) организации“.
Министерството соопшти дека нападите на Пакистан биле „насочени исклучиво кон идентификувани терористички скривалишта, засолништа и инфраструктура за поддршка поврзана со групи одговорни за напади во Пакистан“.
Извештајот на УНАМА, исто така, се осврнува на проблемите со кои се соочуваат жените, кои вклучуваат забрана за образование по основно училиште, строги правила за облекување, речиси универзална забрана за работа и обврска да бидат придружувани од машки член на семејството секој пат кога ќе ја напуштат куќата.
Правилата во врска со женската облека значат дека тие можат да излегуваат само целосно покриени, со шал преку главата, лицето и очите, а спроведувањето на овие прописи е надгледувано од Министерството за ширење на доблести и спречување на пороци.
Во извештајот на UNAMA се додава дека службениците задолжени за прашања поврзани со доблестите и пороците ги посетиле здравствените установи и продавниците во различни делови од земјата за да ги советуваат да им забранат влез на жени без придружба од машки роднина.
Во извештајот, исто така, се наведува дека новите правила за разделба на брачни другари „индиректно го оправдуваат детскиот брак“ со тоа што дозволуваат брачни договори за малолетници.
Пакистан го обвинува Авганистан дека ги засолнува пакистанските талибанци (ТТП), што Кабул го негира.
