Приведен е братот на Виктор Орбан осомничен за криумчарење мигранти
Братот на поранешниот унгарски премиер Виктор Орбан, Арон Орбан, е приведен во рамки на истрага за сомнежи за криумчарење мигранти, објави „Нова.рс“, повикувајќи се на изјава на актуелниот унгарски премиер Петер Маѓар.
Маѓар на Фејсбук напиша дека, според медиумските информации, Арон Орбан е приведен под сомнение за криумчарење мигранти и дека истрагата ја водат Националната канцеларија за враќање и заштита на имотот (NVVH) и Националното истражно биро (NNI).
Според унгарскиот портал „Портфолио“, полицијата утрово спровела координирана акција во Будимпешта и на повеќе локации во областа Пешта. Во рамки на две паралелни кривични истраги биле приведени неколку лица, а биле извршени и претреси во нивните домови.
Според неофицијалните информации на медиумите, Арон Орбан е меѓу приведените. Засега, меѓутоа, нема официјална потврда од надлежните институции за неговото приведување.
Неговото име и претходно се поврзуваше со истрага за сомнителни визни аранжмани. Според претходни медиумски објави, компанија поврзана со него запишувала виетнамски државјани на дводневен курс за спасување животи на Универзитетот во Печ, што можело да им го олесни добивањето шенген-визи.
„Портфолио“ наведува и дека Арон Орбан интервенирал кај владин комесар задолжен за премиерот за да се забрза обработката на барањата за визи.
Надлежните институции најавиле дека дополнителни информации за истрагата и преземените истражни дејствија ќе соопштат во текот на попладневните часови.
