Северна Кореја ја прекина економската соработка со Јужна Кореја

Врховното народно собрание на Северна Кореја се изјасни за откажување на сите договори за унапредување на економската соработка потпишани со Јужна Кореја.

Одлуката беше одобрена за време на 30-от пленарен состанок на Постојаниот комитет на Врховното народно собрание, односно парламентот на Северна Кореја.

Уредбата вклучува укинување на законот за економска соработка, вклучително и посебниот закон за функционирање на туристичкиот проект „Планина Кумганг“.

Посетите на оваа планина го симболизираа почетокот на економската соработка меѓу двете Кореи во раните 2000-ти и привлекоа речиси два милиони посетители од Јужна Кореја.

Потегот на Пјонгјанг дојде откако Сеул го прогласи за „примарен непријател“ поради тензиите на Корејскиот Полуостров.

Севернокорејскиот лидер Ким Џонг Ун минатиот месец предложи Пјонгјанг да ги редефинира односите со Сеул.