Шахпаска – Галовеј: Унапредувањето на положбата на Ромите е заеднички приоритет
Министерката за труд и социјална политика, Јагода Шахпаска, денеска на средба со амбасадорката на Обединетото Кралство во земјава, Рејчел Галовеј, разговараа за тековните проекти на Министерството, со акцент на проектите кои се однесуваат за помош и реинтеграција на Ромите во време на ковид-криза.
Како што соопшти МТСП, Шахпаска истакна дека успешно се реализира втората фаза на Програмата РОМАКТЕД, 2021-2024 година.
-Зајакнување на ромската заедница на индивидуално ниво, како и на ниво на заедница, подобрување на капацитетите и на знаењето, како и подобрување на квалитетот на живеењето и ублажување на ефектите од пандемијата со КОВИД-19 се нашите приоритети, изјави министерката Шахпаска.
Таа исто така потенцираше дека преку проектот „ЕУ за вклучување“ се обезбеди грант во износ од 3,2 милиони евра, за легализација и реконструкција на домовите на Ромите во општините Прилеп, Битола, Кичево, Берово и во Штип.
Амбасадорката Галовеј уште еднаш ја потврди поддршката на Британската амбасада во политиките на Министерството за труд и социјална политика и изрази подготвеност да помогне во процесот на реализирање на проектите од кои очекува позитивни ефекти.
-Законот за лица неевидентирани во Матична книга на родени е пример за решеноста на Владата на Република Северна Македонија да им помогне на лицата кои не можат да ги остварат човековите права поради непоседување документи, рече министерката, притоа нагласувајќи дека на терен биле идентификувани околу 700 лица без документи, а барање за привремен извод поднеле околу 200.
Министерството за труд и социјална политика и Британската амбасада ја продолжуваат својата соработка за поддршка на најранливите категории на граѓани и создавање на едно општество за сите.
