Во тек е процедурата за вработување на првите 300 специјализанти, вели министерот за здравство

Во тек е процедурата за вработување на првите 300 специјализанти во јавното здравство. Тоа е ветено и очекуваме да се реализира до крајот на годината, рече министерот за здравство Арбен Таравари, одговарајќи на новинарско прашање до каде се најавените вработувањата на специјализантите.

„Се надевам дека до крајот на годината ќе се вработат првите 300 специјализанти. За тоа има и одлука на Влада. Воопшто не треба да постојат сомнежи дека целата процедура тече и тоа го знаат и специјализантите. Други 300 ќе се вработат идната година, оти таков беше и планот, 300 плус 300. Но, и овие 600 доктори нема да бидат доволни и да го дополнат недостигот на медицински кадар, како лекари и средномедицински кадар во здравствениот систем“рече министерот за здравство.

Посочи дека не може за неколку месеци додека е тој на функцијата да се среди нешто што е проблематично повеќе од пет или десет години.

„Преземаме чекори во правец на стабилизирање на здравствениот систем. Затоа и се вработуваат овие 600 специјализанти. За средномедицинскиот кадар очекуваме да донесеме одлука за 1 000 договорци да добијат решенија и да овозможиме уште 1 000 да бидат со договор на дело во сите здравствени установи“кажа Таравари.

Во јули на владина седница е донесена одлука за вработување на 300 приватни специјализанти до крајот на годината, како и за уште 300 такви вработувања за потребите на јавните здравствени установи до крајот на 2025 година.

Приватните специјализанти на почетокот на годината излегоа на неколку протести на кои бараа покачување на надоместокот, односно тој да биде на ниво на просечна плата на доктор во јавна здравствена установа. Исто така, бараа здравствено осигурување и решавање на нивниот статус, кој, како што посочија, е невработени лица без здравствено и пензиско осигурување со договор на дело.