Анализа: Пензиите во Македонија доволни за 61 отсто од потребите, во Луксембург со просечна пензија од 28.790 евра двојно повеќе им останува на пензионерите
Дали државните пензии во Европа се доволни за покривање на трошоците за живот? Според истражувањето на компанијата за плати и човечки ресурси Moorepay, одговорот е – Не – за 20 од 39 анализирани европски земји. Во исто време пресметката на трошоците за живот не ја вклучува киријата, па затоа вистинската слика би можела да биде полоша, пишува Euronews.
Во Северна и Западна Европа, пензиите често ги задоволуваат или надминуваат основните трошоци, додека во Источна Европа и на Балканот честопати не успеваат да ги покријат.
Во Северна Македонија спорeд анализата, пензија може да покрие само 61 отсто од основните потреби.
Анализата ги споредува пензиите со трошоците за живот на крајот на октомври 2025 година покажува огромни разлики низ целиот континент. Односот се движи од само 22 проценти во Грузија до дури 225 проценти во Луксембург. Податоците за трошоците за живот, собрани од Numbeo, го претставуваат националниот просек за едно лице и не ја вклучуваат киријата, додека податоците за пензиите доаѓаат од анализа на Moorepay.
Во Луксембург, просечната државна пензија е 28.790 евра, додека трошоците за живот се 12.791 евра. Ова остава вишок од 15.989 евра. Тоа значи дека државната пензија е повеќе од двојно поголема од трошоците за живот.
Пензиите се исто така повеќе од двојно поголеми од трошоците за живот во Италија (210%) и Финска (208%). Шпанија (199%) и Данска (189%) се исто така блиску до ова ниво.
Пензиите како удел во трошоците за живот се движат помеѓу 150% и 180% во неколку други земји, што е сè уште релативно високо.
Овие земји се Исланд (179%), Норвешка (178%), Германија (176%), Белгија (170%), Австрија (165%), Франција (160%), Холандија (159%) и Шведска (158%).
Шест земји се наоѓаат помеѓу 100% и 150%. Тоа се Швајцарија (131%), Ирска (126%), Велика Британија (120%), Полска (112%), Чешка (108%) и Грција (103%).
Пензиите не се доволни во 20 земји.
Во некои случаи, тие сè уште покриваат над 80% од трошоците за живот. Меѓу нив се Словенија (95%), Словачка (94%), Естонија (91%), Португалија (90%), Црна Гора (89%), Литванија (85%), Хрватска (82%) и Унгарија (81%).
Сепак, ситуацијата не е добра во многу земји, паѓајќи под 65% во неколку случаи.
Албанија (29%), Украина (29%) и Молдавија (42%) ја следат Грузија (22%) на долниот крај. Во сите овие земји, пензиите не се доволни за да покријат ниту половина од трошоците за живот.
Пензиите како удел во трошоците за живот се – 53% во Босна и Херцеговина, 58% во Кипар, 61% во Северна Македонија, 64% во Турција и 65% во Латвија.
Ноел Вајтсајд, од Универзитетот во Оксфорд, изјави дека некои земји од ЕУ се едноставно посиромашни од другите и бараат од семејствата да ги субвенционираат пензиските приходи на постарите роднини и да им помагаат.
