Пет вечери храна и македонска музика: Започнува AERO Street Food Festival

04.09.2026 08:52

157 1 минута читање

Од свежо суши и такоси, преку сочни бургери, гиро, пица, фокача и традиционални ќебапи, па сè до палачинки и омилени десерти – богата палета вкусови ќе биде собрана на едно место. Вакво гастрономско доживување носи второто издание на AERO Street Food Festival, кое од 4 до 8 септември ќе се одржува во паркот „Авионче“.

Самото име AERO го отсликува гастрономскиот концепт на фестивалот и обединува четири различни кујни: А – американска, Е – европска, Р – регионална и О – ориентална. Ваквата разновидност носи богато и вкусно мени наменето за сите генерации, а гастрономското доживување ќе биде дополнето со урбана музика, настапи во живо и забавни активности за посетителите.

Учесници годинава се: Burgerslut, Mustacos, Loras Sushi, Fat Kitchen, Jojo’s BBQ, Oljo’s, Noa Gyradiko, Scoop, Bistro 64, Smash Burger, Sorelle, 11: Eleven, „Сутлијаш бар“, „15 за 12“, „Трансилваниско трдло“, Pizza Vice City, „Дестан“, Milkey, Sweet Look и „Жешко компирче“.

Идејата е секој посетител да пронајде нешто по свој вкус, да сподели различни порции со друштвото и да открие нови градски вкусови. По завршувањето на летните одмори, фестивалот е одлична можност пријателите повторно да се соберат, да се дружат и да уживаат во пријатна атмосфера што ги поврзува помладите и повозрасните генерации.

За добрата енергија во текот на сите пет вечери ќе се погрижат домашни бендови и диџеи. На сцената ќе настапат South Park, Ringtones, Dopamine, Marbel и Acoustic Division, а за забавата пред и по концертите ќе бидат задолжени Милан Серафимов, Александар Јорданов, „Јанко петел јаваше“, DJ Marko, DJ Vaso, DJ Rizinski, диџеите од Fluere, DJ Guardian, DJ Ficho и Sure Shotz.

Покрај храната и музиката, секоја вечер ќе биде исполнета и со забавни содржини натпревари во брзо јадење, квизови и предизвици со публиката, под водство на Бомбакис.

Влезот на фестивалот е бесплатен и ќе биде отворен секој ден од 17:30 до 00:30 часот. Настанот е спонзориран од Општина Аеродром и е под покровителство на Град Скопје, а зад организацијата стојат Lions in Move и Cafe Mambo.