Блумберг: Русија нема да ги отстапи окупираните украински територии

Русија повеќе не е подготвена да и врати одредени окупирани територии на Украина како дел од потенцијален договор за завршување на војната, туку планира да ги задржи како тампон зони, објави денеска Блумберг, повикувајќи се на извори од Кремљ.

Според извори, рускиот претседател Владимир Путин се откажал од територијални отстапки бидејќи Русија ги смета најновите изјави на американските претставници за војната во Украина за „конфронтациски“ и ги толкува како доказ дека неформалните договори постигнати на неговиот самит во Алјаска со претседателот на САД, Доналд Трамп, не успеале.

Кремљ го заостри својот став поради ескалацијата на украинските напади длабоко во Русија, вклучително и нападите врз Москва, кои ги оштетија рафинериите за нафта и предизвикаа недостиг на гориво низ целата земја.

Путин, исто така, има намера целосно да го преземе Доњецкиот регион, како и да ги задржи Сумскиот и Харковскиот регион, со цел да ги претвори во тампон зони.

Блумберг објави дека иако САД инсистираат дека на самитот минатиот август не е постигнат договор за прекин на војната на Русија во Украина, претставници на Кремљ постојано тврдат дека во таканаречениот договор „Духот на Енкориџ“ меѓу Путин и Трамп постои пакет обврски, што наводно вклучуваат притисок од САД врз Украина да ѝ предаде територија во регионот Доњецк во замена за враќање на окупираните области на северен Суми и североисточен Харков од страна на Русија.

Разговорите предводени од САД за мировен договор меѓу Русија и Украина се во застој од февруари, бидејќи администрацијата на Трамп се фокусираше на војната со Иран.