Филипче: Високиот број од саботата е варијација и се должи на кластер од штипска конфекција

Високиот број на новозаразени од саботата (241) исто како и некои претходни варијации т.е. отскокнувања од вообичаениот број, се должи на мал кластер во една од конфекциите во Штип, рече министерот за здравство Венко Филипче.

– Една од неколкуте конфекции во кои имаше поголем број заразени е веќе затворена, таму каде што се најдени спорадични случаи вчера во координација со градоначалникот ќе зборуваме со сопствениците, за да видиме дали според епидемиолошките анкети има потреба и тие да се затворат за да се намали ризикот од пренос на вирусот, рече Филипче вчера во гостување на ТВ Канал 5.

Појасни дека високиот број не е тренд, туку варијација затоа што, како што рече, јасно е идентификуван бројот на новодијагнсотицирани пациенти и јасно е утврдено со епидемиолошките прашалници кои во голем процент се завршени, од каде потекнува изворот и трансмисијата на вирусот.

Во таа смисла, рече министерот, вкупната бројка кога тоа ќе се изземе, е она што е тренд сите овие изминати денови односно целиот изминат период. Еден одреден процент, константен, во однос на вкупниот број на новодијагнсотицирани отпаѓа на град Скопје, а сите други се низ државата.

Во однос на постизборните собири, но и забавите по клубовите, Филипче потенцираше дека постојат протоколи за секој настан, секоја организација, без разлика дали е на отворено или на затворено.

-Сите мора да се свесни дека тоа е новиот начин на функционирање. И во затворена просторија кога се организираат едукации, полагања испити итн, се седи на дистанца и се носат маски. На отворено капацитетите се најмногу 50 отсто исполнети, со јасно обележани места каде треба да стојат луѓето. И на отворено, кога има концентрација на луѓе, мора да се носат маските, рече Филипче.

Тој посочи дека мора да има поголеми контроли дали се почитуваат мерките и протоколите. Смета дека во целокупниот систем тоа сериозно заостанувало или не се извршувало и нагласи дека мора да се прави поригорозно, поинтензивно на терен да се прави увид и контрола, да се проверува дали се почитуваат протоколите.

-Ние не можеме да живееме затворени, не може ниту една земја во светот да живее затворена. Единствена дополнителна мерка на тоа што сега е во сила е рестрикција во движењето, што може многу лесно да се избегне ако се почитуваат мерките, потенцираше Филипче.