Засега нема нова распределба на пратениците, вели Гаши

Засега во Собранието, состојбата е статус-кво во однос на нова распределба на пратениците. Се е како што било претходно. Сите пратенички групи продолжуваат да работат. Ако има нови промени, ќе треба тоа да го достават до мене и службите, за да ги информирам другите пратеници. Моментално немаме друга ситуација, рече претседателот на Собранието, Африм Гаши околу евентуални промени во бројката на пратенички групи и префрлување на пратеници од еден во друг табор. Ова следува откако неизвесно е учеството на пратениците од едното крило на Алијанса на Албанците во заедничката коалиција ВЛЕН.

Според спикерот, парламентарната дипломатија е врвен приоритет за него и сака да ја развиеме како држава.

-Јас имав среќа да реализирам историски средби во Берлин, Париз, Стокхолм, Брисел и во ЕП и во седиштето на НАТО. По настаните во Украина и изборите во САД, има нов политички контекст за зголемена волја за нашата држава да го забрза евроинтегративниот процес. Работиме на сите нивоа и ги користам сите алатки и можности за развивање на оваа парламентарна дипломатија. Работиме најмногу за објаснување на пречките околу уставните измени. Имаме многу пријатели и сакаат да ни помогнат. Се надевам дека конечно ќе успееме да ја надминеме пречката, кажа Гаши во изјава за медиумите пред денешната собраниска седница посветена на пратенички прашања.