Туристички ноќевања: Србија назадува, Албанија и Косово шампиони во регионот. Еве каде е Македонија
Податоците на Евростат за третиот квартал од 2025 година покажуваат сè поизразени разлики во движењето на туристичкиот промет во регионот. Додека Албанија и Косово бележат силен раст на бројот на туристички ноќевања, Црна Гора и Хрватска се практично на работ на стагнација, а Србија влезе во зоната на благ пад. Македонија, пак, е во средината со скромен пораст од нешто под два проценти.
Според графиконот што ја прикажува промената на бројот на ноќевања во периодот јули-септември 2025 година во споредба со истиот период од претходната година, Албанија е убедливо најуспешната земја во Европа со раст од околу 30 проценти. Косово исто така бележи двоцифрен раст, од околу 11 до 12 проценти, што го прави една од најбрзо растечките дестинации. По нив следува Македонија, но сепак е далеку зад резултатите на двете соседни земји.
Според податоците од табелата на Еуростат во овој квартал во Македонија биле реализирани вкупно 883.072 ноќевања, за 1,8 отсто повеќе од истиот период претходната година.
Друга табела, пак, со податоци за ноќевања од домашни и странски гости, покажува дека порастот кај нас претежно се должел на домашните гости (за 5,4 отсто повеќе), додека кај странските тој бил повеќе од скромен, за 0,4 отсто во споредба со истиот квартал претходната година.
Од друга страна, Црна Гора и Хрватска како познати регионални туристички дестинации, се малку над нулата, со речиси незабележлив раст, што во пракса значи стагнација во најважниот дел од туристичката сезона.
Србија, за разлика од повеќето земји во регионот, забележа мало намалување на бројот на ноќевања и е во групата земји со негативен резултат.
Според податоците на Евростат, во туристичките сместувачки капацитети низ целата Европска Унија се регистрирани 1,27 милијарди ноќевања, што е 21,3 милиони ноќевања или 1,7 проценти повеќе во споредба со истиот период минатата година, иако ова е побавен раст во споредба со првата половина од 2025 година, кога растот изнесуваше 2,3 проценти.
Дури 21 од 27-те земји-членки на ЕУ забележаа зголемување на бројот на ноќевања. Меѓу земјите-членки на ЕУ, Луксембург, Малта, Полска и Словенија забележаа најголемо зголемување на бројот на ноќевања, со зголемување од околу пет до шест проценти. Солидни стапки на раст постигнаа и Латвија, Словачка и Кипар, додека Шведска, Франција, Унгарија и Италија ја завршија сезоната со умерен плус во опсег од два до четири проценти.
Поголемиот дел од јужна Европа, која традиционално го носи најголемиот дел од туристичкиот промет во ЕУ, доживува само симболичен раст. Грција, Хрватска, Шпанија и Австрија забележаа зголемување на бројот на ноќевања од околу еден до два проценти, додека Данска беше многу блиску до минатогодишното ниво.
Од друга страна, неколку земји-членки ја завршија летната сезона во минус. Најголем пад на бројот на ноќевања е забележан во Литванија, Ирска, Финска и Естонија, каде што туристичкиот промет беше од три до пет проценти помал отколку во третиот квартал од 2024 година. Германија, Холандија, Португалија, Белгија и Чешка, исто така, забележаа мал пад или стагнација.
Иако не е членка на Европската Унија, вреди да се спомене Исланд, кој во третиот квартал од 2025 година забележа еден од најсилните подеми во Европа, со зголемување на бројот на ноќевања од околу 13 проценти во споредба со истиот период минатата година. Така, Исланд беше рангиран меѓу најдинамичните туристички дестинации на континентот.
Извор: nezavisen.mk
