Повеќе не постои рускиот весник „Новаја газета“

Рускиот истражувачки весник „Новаја газета“ денеска ги затвори своите канцеларии во центарот на Москва потклекнувајќи под притисокот од властите за кои тврди дека го оневозможиле понатамошното известување.

Коосновачот на „Новаја газета“ Дмитриј Муратов обраќајќи се до новинарите кои дојдоа да бидат сведоци на затворањето на весникот, апелираше за слобода на говорот и човековите права во воено разорената Русија.

– На оние, во нашата земја, кои се залагаат за мир им е одземено правото да читаат што сакаат, како што гледаме денеска. Во овој момент, делот од рускиот Устав што ги гарантира политичките и граѓанските права практично повеќе не функционира, истакна Муратов, кој во 2021 година ја освои Нобеловата награда за мир.

Портпаролот на Кремљ Дмитриј Песков истакна дека затворањето на „Новаја газета“ е дел од „ротациски процес“ во високо конкурентна медиумска средина.

„Новаја Газета“ е основана од Муратов Михаил Горбачов со пари што последниот советски лидер ги доби со неговата Нобелова награда за мир во 1990 година. Инспириран од визијата на Горбачов за „гласност“, или програмата за отворање на руското општество, весникот стана еден од највлијателните руски дневни весници и бранители на демократијата, познат по своите истраги за корупција и критичко известување за политиката. Изминатите години убиени се шест новинари на „Новаја газета“.